Mga kawani sa siyudad ipaubos og seminar bahin sa kultura sa Singapore

CEBU, Philippines — Gihangyo sa Cebu City Council ang Human Resource Development Office (HRDO) sa pagpahigayon og seminar sa mga empleyado sa City Hall bahin sa kultura ug kasaysayan sa Singapore, ilabi na kon giunsa pag-uswag sa maong nasud.

Kini aron mas masabtan sa mga empleyado ang panglantaw ni Mayor Michael Rama sa paghimo sa Cebu City nga sama sa Singapore.

Si Konsehal Pancrasio Esparis nipasiugda og resolusyon kalabot sa maong butang nga giaprobahan sa konseho.

Gihangyo usab sa konseho ang HRDO nga tigumon ang mga hunahuna sa komunikasyon sa mga trabahante sa City Hall nga adunay mga kaagi ug kahanas nga makita sa ilang biodata, kansang tahas mao ang paghimo og plano sa komunikasyon nga makatabang sa publiko nga masabtan ang kahulugan sa panglantaw sa siyudad sa Sugbo nga sama sa Singapore.

“It is important that the City Hall employees will able to articulate or understand the vision of the mayor, and the general public will hopefully follow,” nagkanayon si Esparis.

Si Esparis niingon nga ang “grand vision” ni Rama angayan sa hingpit nga suportahan sa tanan.

Siya niingon nga ang Singapore-like Cebu City vision, aron mahimong realidad kinahanglang mahimong shared vision.

Suma pa sa World Bank, ang Singapore adunay gross national income nga US$54,530 per capita, sa tuig 2017. Ang GDP nga pagtubo niini maoy usa sa pinakataas sa kalibutan, sa average nga 7.7% sukad sa independensya ug nag-una sa 9.2% sa unang 25 ka tuig.

Gikonsiderar usab kini nga usa ka “business-friendly “nga lugar.

Sa pagkutlo sa World Bank Human Capital Index, ang World Bank miingon nga ang Singapore nagranggo sa pinakamaayong nasud sa kalibutan sa pagpalambo sa human capital.

Niadtong Agosto, si Rama nipagawas og executive order nga nagsagop sa usa ka siyudad nga sama sa Singapore isip panglantaw sa siyudad ug nagtukod og public-private special corporate-oriented structure, plataporma, ug mekanismo alang sa maong katuyoan.

Ang EO nag-ingon nga ang tanang plano sa gobyerno, aktibidad, proyekto, ug programa sa dakbayan, lokal man o national, nga nahasubay sa maong panglantaw kinahanglang hatagan og prayoridad. MEL (BANATNEWS)