Educational assistance ihatag atol lang sa payout schedule
CEBU, Philippines — Ang Department of Social Welfare and Development (DSWD) Central Visayas miawhag sa mga beneficiaries sa educational assistance nga mosunod sa payout schedule aron malikayan ang pagdasok ug kaguliyang sa mga tawo diha sa payout centers niini.
Ang maong advisory sa DSWD-7 gipagawas human kagahapong adlawa, Agosto 22 giingong dunay mga tinun-an nga midagsa sa ilahang buhatan sa Barangay Carreta, siyudad sa Sugbo ingon man satellite offices sa rehiyon aron magpalista sa ilang kaugalingon isip recipient o kaha mokuha og financial assistance.
“Dili na kinahanglan nga magpalista og una, busa ayaw na kamo pag-adto sa mga opisina sa DSWD dinhi sa Carreta ug sa mga SWAD sa matag probinsya,” tipik sa advisory.
Sa maong advisory sab gipahibawo nga mangapud-apod sila sa Educational Assistance matag adlaw’ng Sabado, Agosto 27, September 3, September 10, September 17 ug September 24.
Ang mga eligible beneficiaries dili na kinahanglan mobisita sa ilang local social welfare and development office tungod kay ang Local Government Units(LGUs) o Barangay ang mopahibawo sa lugar alang sa payout.
“Gihangyo namo ang tanan, nga magpaabot lamang gayud sa mga pahibalo gikan sa opisina sa DSWD kung asa kamo moadto panahon sa payout,” dugang sa DSWD-7.
Ang Regional Social Welfare Office miawhag sa mga recipients nga andamon ang mga rekisitos aron mahatagan og ayuda sama sa Certificate of Enrollment o ubang supporting documents pamatuod nga nga sila na-enrol, identification cards(IDs) nga dunay usa ka photo copy.
Ang DSWD ug Department of Interior and Local Government(DILG) sa laing bahin mopirma og memorandum of agreement(MOA) aron magtinabangay sa distribusyon niini .
Si DSWD Secretary Erwin Tulfo miingon nga P500 milyones nga cash assistance para sa mga kabus nga tinun-an ang ihatag.
Moabot na og 48 mil ka tinun-an ang ilang nahatagan nga mokantidad na og P141 million sukad gisugdan ang payout.
Dinhi sa Central Visayas moabot na og 4,511 ka tinun-an ang nahatagan niadtong Agusto 20,2022.— Rowena Capistrano/IBM (BANATNEWS)
- Latest
