Gwardiya sa mga establisamento sa Talisay gitapok sa kapolisan

CEBU, Philippines — Gidasig sa kapolisan sa siyudad sa Talisay ang mga gwardya sa nagkalain-laing establisamento nga mas magmabinantayon pa karong panahona.

Kini aron masiguro nga di makaporma ang mga dautang elemento nga makapamiktima sa edipisyo nga ilang gibantayan.

Si Police Lt. Col. Randy Caballes, hepe sa kapolisan sa Talisay nitataw nga sa ilang pakighinabi sa mga gwardya ilang gitagaan sa mga panagway sa kiriwan og kamot ug mga kawatan.

Gitudloan usab sa kapolisan ang mga gwardiya sa paghimo og profiling sa mga kawatan ingon man sa ilang gamit nga modus.

Nalantawan sa kapolisan nga mas modaghan pa unya ang mga tawo nga mosulod ug mogawas sa nagkalain-laing establisamento ilabi na nga magsugod na ang klase sunod semana.

Gidasig sab ni Caballes ang mga tag-iya sa establisamento sa pagbutang og daghang CCTV camera aron matag lihok sa kriminal makit-an ug dali sila madakpan.

Nagpasalamat si Caballes sa mga tag-iya og establisamento gumikan sa ilang pag-kooperar sa programa aron kalikayan ang mga dautang elemento sa katilingban.