Hazard lights giabusar paggamit

CEBU, Philippines — Gipahimangnoan sa Cebu City Transportation Office ang mga motorista kalabot sa pagpataka lang og gamit sa hazard lights kay dunay gipaabot diha sa kilid sa dalan.

Bisan sa pagsige og bunok sa uwan nagpadayon ang ilang pag- roving sa kadalanan aron mahapsay ang dagan trapiko sa siyudad.  

Atol sa maong operasyon ,  naka-isyu ang maong buhatan  og 50 kapin ka citation tickets.

Ang  pagpataka og gamit sa hazard  nga nalatid sa City Ordinance 1777  kay ginadili gyud ilabi na kadtong  mag-park lang sa kilid sa kadalanan kay anaay gihuwat.

Base sa ordinansa  mahimo rang mogamit niini kay kadto rang  mopadulong sa mga hospital nga adunay mga emerhensiya apil niini ang mga ambulansya, bombero ,kapulisan ug uban nga mga sangang buhatan nga motubag og emerhensiya.

Nagkanayon ang CCTO nga ang mga sakyanan  nga mo-park sa kilid sa kadalanan nga walay  kalabotan sa emerhensya,  mahimong isyuhan  og duha  ngadto sa tulo  ka violations nga naglangkob sa  “illegal use of hazard”  “disregarding of traffic signs” ug “obstruction to the flow of traffic.”

“Busa tuman lang kamo sa lagda sa trapiko para dili kamo mapuherwesyo ilabi na og dili ninyo tagdon ang inyong mga citation ticket kay kamo mapasakaan og kaso,” tipik sa mensahe sa CCTO nga namantala sa ilang social media account.

Nasayran nga usa ang CCTO ang gipatabang sa kagamhanan aron mamentinar ang kahawan sa mga sidewalk aron mahimong tulin ang pag-agi sa mga tawo , ug sa  susamang higayon, malikayan ang problema sa trapiko. —IBM (BANATNEWS)