CEBU, Philippines — Nagpahigayon og ocular inspection ang Office of the Building Officials sa Cebu City Hall sa mga buildings nga natukod sa siyudad sa Sugbo diin usa lang kini sa ilahang daily routine.
Usa sa ilahang gisusi mao ang gitukod nga mall diha sa A. Soriano Street, North Reclamation Area, ning siyudad.
Suma ni Architect Florante Catalan, pangulo sa OBO Cebu City nga nakatuman ra ang kadagkuan sa gitukod nga mall sa building plans nga giaprobahan sa ilang buhatan. Lakip sa ilang natuman mao ang pagbutang og safety measures sama sa safety nets, ug ang mga trabahante nagsul-ob ra og hard hat.
Nasayran gi-require usab sa OBO ang pagbutang of Earthquake Recording Instrument (ERI) sa mga edipisyo aron kun dunay linog mahibaw-an ang status sa building kun safe paba o dili na.
Si Engr. Edgar Amparado, Project Engineer sa gitukod nga mall mitataw nga estrikto gyud sila sa lugar kay tumong nila nga mapaspasan ang trabaho apan unahon ang kaluwasan sa mga tawo ug ibutang nila ang ERI sa dili pa pasudlan og mga tawo ang maong mall.
Sa laing bahin naka standby na ang mga sakop sa Cebu City Disaster Risk Reduction and Management Council(CCDRRMC) sa posibleng pagpadala og team sa lugar nga naapektuhan sa linog. Suma pa ni Atty. Gerry Carillo, Chairman sa CCDRRMC nga kini samtang nag-establisar pa og supply line alang sa pagtabang sa mga apektadong lugar sa Ilocos Sur nga gitay-og sa 7.3 magnitude nga linog.
Ang Office of the Civil Defense (OCD) mimando sa disaster office sa Regions 6, 7 ug 8 nga mo-standby alang sa pagtabang sa mga apektadong lugar. MEL (BANATNEWS)