CEBU, Philippines — Gibutyag sa pangulo sa Cebu City Office for Substance Abuse Prevention (COSAP) Jonah John Rodriguez nga walo ka barangay sa Siyudad sa Sugbo ang ipaubos sa deliberasyon sa sunod buwan aron madeklara nga drug-cleared barangay.
Gihulagway ni Rodriguez nga dili sayon nga madeklara ang usa ka barangay nga drug cleared gumikan kay daghan ang proseso nga again ug usa niini ang pag-awhag sa mga anaa sa drug watch list nga mopaubos og outpatient o Community Based Drug Rehabilitation Program (CBDRP).
Ang mga rekisitos nga gikinahanglan aron ang usa ka barangay madeklarar nga drug cleared mao nga ma-all accounted for ang tanang lista ug kinahanglang tanang na-enroll dili magsige og ka positive ug dili usab magsige og absent.
Ang Cebu City aduna nay 13 ka barangay nga nadeklara nga drug cleared kini gilangkuban sa Sto. Niño, Parian, Sudlon 1, Sudlon 2, Sapangdaku, Buot, San Antonio, Basak Pardo, Pamutan, Toong, Sinsin, Lusaran ug Kinasang-an. Nunot niini, gitinguha karon ni Mayor Teresa Alegado nga mahimong drug free municipality ang Lungsod sa Consolacion.
Giawhag ni Alegado ang opisyales sa barangay nga mopahugot pa sa ilang suporta sa kampaniya sa pagsumpo sa ilegal nga drugas sa ilang tagsa-tagsa ka mga dapit.
Lakip karon sa ilang himuon mao ang pagpaubos sa mga barangay og duha ka adlaw nga seminar kalabot sa hiningusgang kampaniya batok sa ilegal nga drugas.
Ug palig-onon usab nila ang Barangay Anti-Drug Abuse Council (BADAC) functionality diin tumong niini ang paghatag og kasayoran sa gahom ug kapasidad sa BADAC sa anti-ilegal drug campaign sa kagamghanan sa maong lungsod.
Ang lungsod adunay 14 ka barangay karon nga gi-workout nga madeklara sa Regional Oversight Committee on Barangay Drug Clearing of the Philippines Drug Enforcement Agency.
Sa laing bahin, tulo ka suspetsadong drug pusher ang nasikop atol sa buy bust operation sa Cebu Provincial Police Drug Enforcement Unit (CPPDEU) ug kapolisan sa Compostela Police Ststion diha sa Barangay Cambayog, Lungsod sa Compostela.
Ang mga suspetsado mao sila si Jay-Ar Maramara Alicantem, ex-convict ug usa ka high value individual, Georgen Monisit Badolgo ug Darwin Sunghid Maramara, usa usab ka ex-convict ug mga residente sa maong dapit. —/BDB (BANAT NEWS)