Puya gipaanod sa sapa

CEBU, Philippines — Usa ka puya nakit-an nga wala nay kinabuhi ang napalgang nag-utaw-utaw sa sapa sa Sitio Dumpsite, Barangay Arpili sa lungsod sa Balamban kagahapon sa buntag adlaw nga Lunes.

Si Police Corporal Jun Carlo Dy, Desk Officer sa Balamban Police Station miingon nga babaye ang maong puya nga gibana-bana naa sa walo ka buwan ug gituohan nga bag-o pa kining gianak sa dihang nakit-an nga naglutaw-lutaw sa sapa.

Atol sa pagsusi sa kapulisan gituohan nga dili pa kini dugay nga gianak tungod kay presko pa lawas ug nakapaguwa pa kini sa iyang hugaw.

Gisubay karon sa kapulisan kun kinsa ang nanganak sa maong lugar.  Dako ang pagtuo sa kapulisan nga naa ra sa duol nga komunidad ang inahan niini.—Rowena D. Capistrano/IBM

50 LGUs nangandam sa Pasigarbo sa Sugbu

Pipila sa mga lungsod sa Probinsya sa Sugbo ang nagsugod na og recruit og mga dancers gikan sa ilang mga dapit alang sa hulmahong contingents nga morepresentar sa ilang lugar  umaabot nga Pasigarbo sa Sugbo 2022.

Usa niini ang lungsod sa Samboan nga mi-post sa ilang Facebook page nga nianunsyo nga nanginahanglan ang lungsod og dancers ug props men aron morepresentar sa ilang lugar sa maong festival.

Ang lungsod sa Samboan mopasigarbo kini sa Dagayday Festival sa lungsod sa karong tuig nga Pasigarbo sa Sugbo.

Si Barili Mayor John-John Garcia sa iya sab Facebook account duna say samang panawagan sa mga taga Barili  nga gustong moapil sa Panumod Festival dancers.

Samtang didto sa lungsod sa Alegria nipahigayon usab sila og screening sa mga gusto mahimong dancers alang sa Kawayan Festival sa lungsod.

Nasayran nga 50 ka mga LGUs ang moapil sa Pasigarbo sa Sugbo karong tuiga. Dunay financial assistance gikan sa kapitolyo ang mga mosalmot nga LGUs.

Ang Pasigarbo sa Sugbo ipahigayon sa Agosto 28 sa Cebu City Sports Center subay sa ika 453rd nga Kasumaran sa Probinsya sa Sugbo.— IBM (BANATNEWS)