Crux Stat Dum Volvitur Orbis
Sud-onga hinigugmang Jesus
Kining mga alaut ug kabus
Naninguha nga kanimo mahisama
Makanunayon diha sa gugma
Crux Stat Dum Volvitur Orbis
Lig on ang Krus nga among gigakus
Crux Stat Dum Volvitur Orbis
Kalibutan, dangog ug tay-og
Ang buhing pagtuo kanamo motuhop
Binisbisan sa imong kaaghop
Isilsil ning among dughan
Gugma’ng imong gimbut-an
Crux Stat Dum Volvitur Orbis
Lig on ang Krus nga among gigakus
Crux Stat Dum Volvitur Orbis
Kalibutan , dangog ug tay-og
Sa panaw nga mangitngit kami nagpingg-it
Hinikawan sa bidlisiw ug kainit
Sa paglaum unta kami agaka
Kay kurog among tuhod, linaktan haguka
Crux Stat Dum Volvitur Orbis
Lig on ang Krus nga among gigakus
Crux Stat Dum Volvitur Orbis
Kalibutan, dangog ug tay-og
Pamalandong
Mingaw ang palibot ug gibati ko ang tumang kalaay. Hapon kadto ug akong nahinumdoman ang panultihon sa mga Carthusians nga nagkanayon: “Crux Stat Dum Volvitur Orbis. The Cross is steady while the world is turning around.” Mao kini ang iyang hubad.
Kadaghanan nato ang buot mamahimong malipayon nga hawa sa sakripisyo. Apan diha sa atong pagka dinihogan dili mahimong mahawa gikan kanato ang Krus. Simbolo man tuod kin isa kaulawan alang sa mga kalibutanon ra kaayong katawhan apan krus kun buot hunahunaon simbolo sa atong kadaugan, kalingkawasan ug kaluwasan. Laing kanta na pud ning akong gitagik.
Manghinaut lamang ako nga mamahimo kining sukaranan sa laing panaw uban ang Krus diin gilansang ang Ginoo nga nagluwas kanato.
- Latest
