CEBU, Philippines — Gipahibalo ni Mayor Michael Rama kagahapon nga si Raquel Arce maoy iyang pahupton sa Cebu City Disaster Risk Reduction and Management Office (CCDRRMO) . Apan motabang gihapon si Arce sa pagdumala sa Prevention Restoration
Order Beautification and Enhancement (PROBE) ug Market Operations Division (MOD) diin gidumala niya kini sulod na sa taas nga katuigan.
Nasayran nga si Arce usa sa mga karaan nga sinaligan ni Rama. Bisan sa panahon nga wala pa si Arce sa CCDRMMO giingong aktibo na siya sa pagresponde kon adunay mga kalamidad.
Magpabilin gihapon si Atty. Gerry Carillo isip chairman sa Cebu City Disaster Risk Reduction and Management Council (CCDRRMC).
Samtang ang kanhi konsehal sa Siyudad sa Sugbo nga si Erik Espina maoy palingkuron ni Rama sa city hall nga susama sa trabaho ni Communication Secretary Martin Andanar.
Nagkanayon si Rama nga nakita niya kang Espina ang kapasidad niini alang sa pag-umol og diskusyon sa kasikas sa siyudad nga sama sa talento ni Andanar. (BANAT NEWS)