Mga dalan sa Cebu City i-endorso sa national

CEBU, Philippines — Gipahibalo ni Konsehal Jerry Guardo nga adunay major roads sa Dakbayan sa Sugbo nga gikatakda nila nga i-endorso ngadto sa nasudnong kagamhanan aron matutokan ang pagmentinar niini sama sa pag-ayo o pagpa-aspalto.

Matud ni Guardo nga ang maong mga dalan una kining gimentinar sa kagamhanan sa Siyudad sa Sugbo ug panahon na nga  ang nasudnong kagamhanan ang mo atiman niini pinaagi sa Department of Public Works and Highways (DPWH). Sa pagkakaron, adunay siyam ka major roads ang na-identify nila nga i-endorso ngadto sa nasudnong kagamhanan.

Ang maong mga dalan naglangkub sa Sanciangco, Escario ,Leon Kilat, F. Ramos, J. Alcantara , P. del Rosario , Junquera , F. Vestil, ug A. Soriano.

"Once ma- convert na into national road, sila na pod ang mag-maintenance ana sa pagpa- aspalto sa dalan.  Aron wala na gyu’y lubak-lubak ang atong main roads”, matud ni Guardo.

Sa maong pamaagi mas mapalapdan sa siyudad ang pagpa-aspalto sa ubang mga lugar ilabi na sa barangay roads o sa mga interior nga kadalanan.

Nagkanayon si Guardo nga gihingusgan sa kagamhanan ang mga pagpatarong sa kadalanan ilabi na diha sa kabukiran.

Tumong niini nga mahatagan og tulin nga pagbiyahe ang mga motorist ug dili usab magsapaw ang mga proyekto sa lokal ug nasudnong kagamhanan hinungdan nga mas daghan ang mga dalan nga mapatarong dinhi sa siyudad.

Usa sa mga kaayohan nga maumol niini mao ang tulin nga pag-transport sa mga produkto sa mag-uuma sa kabukiran paingon sa mga merkado. —/BDB (BANAT NEWS)