P31 usbaw sa suholan hapon na ipatuman
CEBU, Philippines — Sugdan na og pagpatuman ang P31 nga umento sa suholan sa mga minimum wage earners sa Central Visayas karong umaabot nga Hunyo 14, 2022 human nga napublikar na sa mantalaan nga Freeman ang Wage Order No. ROVII-23 alang sa minimum wage private workers ug wage order No. ROVII-D.W.03 alang sa mga domestic workers sa region 7.
Ang wage order mapatuman kini 15 ka adlaw gikan sa publication niini sa usa ka mantalaan.
Ang Regional Tripartite Wages and Productivity Board-7 niaprubar sa P31 nga umento sa inadlaw nga suhol sa mga trabahante sa Central Visayas.
Samtang P500 usab ang umento sa binulan nga sweldo sa mga katabang.
Tungod sa pagsaka sa sweldo ang minimum wage o sa mga trabahante ubos sa Class A anaa na sa P435 matag adlaw, P397 sa mga trabahante sa Class B ug P387 sa mga trabahante sa ubos sa Class C.
Una na nga gianunsyo sa Central Visayas Wage Board sa miaging semana ang P31 nga usbaw sa basic pay sa rehiyon apan mas ubos kini sa wage increase nga giaprubahan didto sa Western Visayas nga P55 ug P110. Nakadawat kini nagkalain-laing reaksyon sa publiko, dunay nalipay apan dunay nadismaya tungod sa kagamay sa usbaw.
Ang Alyansa sa mga Mamumuo sa Sugbo-Kilusang Mayo Uno (AMA Sugbo-KMU) nadismaya ug mihulagway nga insult kini sa mga mamumuo tungod dili paigo ang usbaw sa kasamtangang sitwayson nga nimahal tanang presyo sa palaliton.
Samtang si Cebu City Mayor Michael Rama nagkanayon nga nakasabot siya sa reaksiyon sa mga tawo. Giawhag ni karon ang mga magpapatigayon nga sundon gyud ang maong kamandoan.
Matud ni Rama nga susihon sab niya ang posibilidad sa tax amnesty aron matabangan ang mga negosyante. —Sanden J. Anadia/IBM (BANATNEWS)
- Latest
