Buhatan sa mga konsehal sa Cebu City giimbentaryo

CEBU, Philippines — Gipahibalo sa  Department of General Services (DGS)  nga gisugdan na sa ilang buhatan ang imbentaryo sa mga butang nga anaa sa buhatan sa mga konsehal ilabi na kadtong mahuman na sa ilang panerbisyo karong Hunyo 30,2022.

Matud ni Engineer Rolly Ardoza, hepe sa DGS nga gimandoan na niya ang iyang mga sakop nga mopahigayon og imbentaryo.

Base sa taho sa Cebu City Public Information Office nga gibutyag ni Charity Marcos, supply officer III sa DGS nga aduna sila’y suwat ngadto sa pipila ka mga konsehal nga nagpahibawo kanila kalabot sa pagpahigayon nila og imbentaryo.

Lakip sa ilang giimbentaryo ang mga butang diha sa buhatan sa mga konsehal nga dili outgoing.

Tumong niini mao ang pagsusi sa accountability sa mga butang sa kagamhanan nga anaa sa tagsa-tagsa ka mga buhatan sa mga konsehal.

Matud ni Ardoza nga ang mga buhatan sa outgoing nga konsehal ang giuna nila og imbentaryo.

Si Konsehal Eugenio Gabuya sa south district anaa na karon sa kataposang termino ug si Konsehal Niña Mabatid kinsa napildi sa pagka-kongresista sa north district sa nilabay’ng eleksiyon ang mobiya na usab sa iyang buhatan diha sa city hall karong Hunyo 30, 2021.

Lakip nga mobiya sa ilang buhatan diha sa city hall sa nahisgutang adlaw sila si Konsehal Alvin Dizon ug Lea Japson sa north district kinsa parehong napildi sa nilabay’ng eleksiyon.

Ang DGS mosaksi kini sa pag-turnover sa mga butang sa outgoing nga konsehal ngadto sa mohulip kanila.

Nasayran nga ang Siyudad sa Sugbo aduna kini 19 ka green buses ug duha ka coaster diin pulos kini nagdagan.

Ug adunay duha  usab ka sakyanan sa Department of Public Services (DPS) ang gi-recall sa DGS. BDB (BANATNEWS)