Absentee voting nagsugdan na kagahapon

CEBU, Philippines — Ang paghatag og importansiya sa kalamboan ug kaayohan sa nasud ang rason nga nibotar si Police Staff Sergeant Archie Borres sa Cebu City Police Office sa unang adlaw sa absentee voting nga gipahigayon diha sa Abellana National School.

Matud ni Borres nga ni-avail siya sa absentee voting tungod kay sa adlaw na unya sa piniliay karong May 9, 2022 dili na sila makahigayon sa pagbotar gumikan kay i-deploy man sila aron motabang pagbantay sa siguridad sa polling precincts.

Nasayra nga kagahapon nagsugod na ang absentee voting ug matapos kini sa Abril 29 diin ang mga mahimong maka-avail niini miyembro sa Philippine National Police, Armed Force of the Philippines, government officials ug employees ug media practitioners.

Ang mahimong botaran sa absentee voting mao ang national positions lang gikan sa presidente, bise presidente, senator ug party list. Dul-an sa 2,000 ka police personnel gikan sa Police Regional Office-7, Cebu Provincial Police Office, Mandaue ug Lapu-Lapu ang nibotar.

Ang absentee voting magsugod man sa alas 8:00 sa buntag hangtud sa alas 5:00 sa hapon sulod sa tulo ka adlaw.

Aron maka-avail sa absentee voting kinahanglang mo-apply kini sa buhatan sa Comelec ug ang deadline nga ilang gihatag niadtong Marso 7, 2022. Nunot niini, si Comelec Cebu City South District Election Officer Marilou Paredes nagkanayon nga nagsige pa sila og kuha og digital signature sa electoral boards isip pagpangandam sa umaabot nga May 9, 2022 national ug local elections.

Sa tibuok north ug south district sa Cebu City adunay 2,892 ka electoral boards nga nagkinahanglan og digital signature ug ang ilahang pagserbisyo adunay allowance sama sa COVID allowance nga P500, transportation allowance, honorarium lakip ang lima ka adlaw nga leave credits nga adunay bayad.

Nasayran nga ang Comelec nihimo og refresher course sa tanang buhatunon sulod sa polling place, health protocol ug verification sa Precincts Computerized Voters List ug uban pa.  Sa mga botante nga mag-body temperature og 37.5 pataas dad-on sila sa Isolation Polling Place aron ma-monitor ang temperatura ug kon moubos na ilabi na nga nisaka lang kini tungod sa kainit sa panahon mahimo na kining makaadto sa iyahang presinto.

Ug kon dili moubos ang temperatura adunay support staff ang Comelec nga moadto sa presinto ug kuhaon ang balota niini ug dad-on sa Isolation Polling Place aron adto mobotar.

Isip kabahin sa health protocol aduna COVID marshal nga gibutang sulod sa voting center ang Comelec.

Samtang sa Dakbayan sa Talisay, niabot sa 1,001 ka botante nga kasamtangang binilanggo sa Bureau of Jail Management and Penology ang gilaoman nga mobotar karong Mayo 9 nga piniliay.

Si Atty. Anna Fluer Gujilde, election officer sa siyudad nibutyag nga magsugod sa alas 7:00 sa buntag ang pagbotar hangtud sa alas 2:00 sa hapon. Dili kini parehas og oras sa regular nga voting centers nga magsugod sa alas 6:00 sa buntag hangtud sa alas 7:00 sa gabii. —Rowena D. Capistrano, Gabriel C. Bonjoc/BDB (BANATNEWS)