CEBU, Philippines — Pormal na nga gilusad kagahapon sa Cebu City Tourism Commission (CCTC) ang Highland Pilgrimage Tour diin nakasentro kini alang sa mga posibleng lugar nga mahimong duawon sa mga tawo panahon sa Semana Santa.
Matud ni Konsehal Jocelyn Pesquera, pangulo sa CCTC nga ilaha na nga nasuta nga mahimo ra nga dili moadto og layong lugar nga gawas sa siyudad alang sa pag-umol og nagkadaiyang kalihokan o pamalandong panahon sa kuwarisma.
Nasayran nga adunay mga lugar sa Siyudad sa Sugbo nga haom kaayo alang sa maong katuyoan ilabi na kadtong nagplano nga mag-Via Crucis sa kabukiran.
Pipila ka stake holders ang gidala sa CCTC kagahapon diha sa mga lugar nga mahimong duawon panahon sa Semana Santa ug nahimo na usab nga tipik sa turismo sa siyudad.
Kagahapon nibisita sila diha sa Tabor Hills sa Barangay Talamban ug sa ilado nga relics chapel niini diin dagsaan kini sa mga tawo ug lakip sa mobisita niini ang mga taga laing lugar.
Gibisita usab nila ang Our Lady of Manaoag Rosary Sanctuary lakip na ang garden ug museum niini, St. Mary Co-Redemptrix Church nga nahimutang gihapon sa susama nga barangay.
Matud usab ni Pesquera nga ubay-ubay sa bukirang bahin sa siyudad ang gitawag og Calvary Mountains nga haom kaayo sa gibuhat nila nga pilgrimage tour.
Gawas nga nakatabang sa pag-ugmad sa turismo ang maong mga lugar nakahatag usab kini og koneksiyon alang sa spiritual nga aspeto sa matag inbidwal.
Ug sa habig sa patag nga bahin sa siyudad usa sa naandan nga kalihokan panahon sa Semana Santa ilabi na sa Biyernes Santo mao ang Buhing Kalbaryo.
Ibalik na ang pisikal nga presentasyon niini karong tuiga ug giingong usa ang maong dula sa entablado nga atangan sa mga turista.
Sa laing bahin, padayon nga gi-promote karon sa CCTC ang nasugdan na nila nga “Highland Bloom and Ecotourism” project. Pipila sa mga bukirang barangay nga daghan ang tourist spots naglangkub sa Busay, Tagbao, Malubog ug Sirao.
Ang Barangay Tagbao aduna kini duha ka waterfalls diin haom ang canyoneering niini.
Gawas sa falls aduna usab kini flower farm, mountain spots, hamugaway nga mga kan-anan, botanical garden, resort ug uban pa.— BDB (BANATNEWS)