Lacson pabor sa pag-usab sa Labor Code alang sa mga kawani

CEBU, Philippines — Bukas si Partido Reporma standard-bearer Panfilo Ping Lacson alang sa pag-amendar sa Philippine Labor Code aron maibanan ang pag-antos sa mga yanong mamumuo.

Iya kining gipadayag isip pag-uyon sa posisyon sa mga labor rights leader ug ubang mga presidential candidates sama kang Leodegario ‘Ka Leody’ de Guzman.

Una niini sa gihimong pagtuki sa giplano nga four-day workweek schedule sa mga kawani taliwa sa nagkasaka nga presyo sa mga produktong petrolyo gipadayag ni De Guzman nga ubos sa maong arrangement ang mga empleyado maka demanda og overtime pay sa higayon nga molapas na sila sa oras sa trabaho.

Sumala pa ni Lacson nga daghang mga employers ang posibleng mosupak niini. Apan ang solusyon niini mao ang pagusab sa Labor Code aron mohaum sa maong tumong.

“Tama po si Ka Leody, ano, kasi talagang hihingi ng overtime pay. Kailangan pa rito i-amend pa natin ‘yung Labor Code para payagan, para hindi mag-demand ‘yung ating mga manggagawa ng overtime pay ‘pag lumampas na sila sa walong oras,” matud ni Lacson atol sa ‘Pilipinas Debates 2022: The Turning Point’ nga gihimo niadtong Sabado sa gabii.

Una nang gipadayag ni Lacson nga iyang suportahan ang maong sugyot alang sa four-day workweek schedule aron makadaginot ang mga empleyado ilabi na sa pletihan.

“’Yung four-day workweek, dagdagan natin ‘yung oras ng trabaho, sa halip na walong oras, gawin nating sampung oras para 40 hours din ang kanilang pagtatrabaho. Para ‘yung sweldo nila—maski ‘yung arawan ganoon din—para ring nagtrabaho ng limang araw. Temporary lang,” matud ni Lacson.

Gisuportahan usab ni Lacson ang hangyo sa mga nagtrabaho sa business process outsourcing (BPO) industry nga lugwayan ang work-from-home arrangements, bisag ipaubos na ang tibuok nasud sa transisyon gikan sa state of pandemic ngadto na sa endemic.

“‘Yung hiling ng mga BPO sector na palawigin ‘yung kanilang work-from-home from April hanggang September, sinusupurtahan ko po ‘yun dahil maraming nagsara na mga opisina nila at gusto nilang magpatuloy ng work-from-home. Total meron naman tayong [telecommuting ‘di ba, ‘yung batas na ito—Telecommuting Act,” dugang ni Lacson.

Gihimug-atan usab ni Lacson nga gikihanglan nga palambuon ang internet services sa nasud aron masuportahan ang maong lakang.

Aron pagkab-ot niini gikinahanglan nga dunay igong pundo ang national broadband highway program sa gobyerno. Ang maong programa nagkinahanglan og dili mominus P18-billion nga budget.