CEBU, Philippines — Hayan masuroyan na pagbalik sa katawhan ang park and plaza sa Dakbayan sa Talisay karong buwana.
Nasayran nga gipaspasan sa kontraktor ang pagtrabaho niini.
Gisusi na ni mayor Gerald Anthony “Samsam” Gullas uban sa mga konsehales, tourism officer, taga DPWH ug engineering department sa siyudad ang maong proyekto.
Tinguha sa mayor nga magamit na kini sa publiko karong buwana ug gusto niya nga personal nga makita ang kalambuan sa trabaho sanglit gusto niya nga mabuksan kini sa publiko karong Marso 26 dungan sa selebrasyon sa Talisay landing.
Si Mikkie Aznar, tourism officer sa dakbayan nitataw nga naapektahan ang proyekto sa bagyo apan dali rasab sila nakapadayon niini.
Sigon pa ni Engr. Leonardo Abao sa DPWH nga 90 porsyento nga nahuman na ang phase 1 samtang 80 porsyento nga nahuman ang phase 2 nga mao ang upat ka andana nga edipisyo.
Nagkanayon si Aznar nga hinay-hinay na sila sa pagbalik sa turismo ingon man sa ekonomiya pinaagi sa proyekto nga ikalipay sa Talisaynon. (BANAT NEWS)