CEBU, Philippines — Gitinguha karon ni Cebu City Mayor Michel Rama ang pagpakural sa tibuok palibot sa Pasil Fish Port aron dili kini mahimong pinuy-anan sa ubang tawo.
Ang maong plano ni Rama nitumaw dihang sa iyang pagbisita sa niaging adlaw sa maong fish port uban ang mga taga Department of Engineering and Public Works (DEPW) ug pangulo sa Prevention Restoration Order Beautification Enhancement (PROBE) Raquel Arce nabantayan nila nga gihimo nang puy-anan sa ubang mga tawo ang fish port.
Nabantayan usab ni Rama nga gibutangan kini og mga tangkal sa manok nga igtatari ug adunay usa ka bahin sa fish port ang gihimo na nga basketbolan ug adunay naabtan nga nanglaba.
Nisamot ang kasagmuyo ni Rama dihang nakita usab niya nga adunay mga nagtipun-og nga basura diha sa fish port.
Gimandoan dayon ni Rama si Arce nga sa daling panahon kinahanglang mapangitaan og paagi nga makural ang fish port aron dili na kini mapuy-an. —BDB (BANATNEWS)