Mga manindahay sa Warwick Barracks ug Freedom Park gipabalhin na
CEBU, Philippines — Ang Vice Chairman sa Megawide Constructions Corp. Louie Ferrer nagkanayon nga andam siya moatubang sa congressional hearing.
Sayo pa, ang mga manindahay diha sa Warwick Barracks ug Freedom Park gitabangan kini sa grupong Gabriela aron ang ilahang reklamo labot sa
modernisasyon nga pagahimuon sa Carbon Public Market maabot ngadto sa Kongreso ug matigayon ang congressional hearing kalabot niini.
Ang Cebu City Government ug Megawide Construction Corp. nigama og Joint Venture Agreement alang sa modenisasyon sa Carbon Public Market.
Matud ni Ferrer nga mas maayo nga adunay congressional hearing nga mahitabo aron mas mapasabot pa nila sa tanang katawhan ang tumong nila sa Carbon Market.
“So why not para intero Pilipinas ma-share nato atong plano. Okay lang, why not ‘(mo-appear sa congressional hearing) mura’g gahanan mi ma-share atong vision, magpasalamat ko sa ila kay gitagaan ta og venue para atong ma-share atong plano sa entire Philippines and maybe to the world”, ni Ferrer pa.
Nasayran nga kagahapon gibuksan sa Megawide Construction Corp. ingon man sa Cebu City Government ang interim market diha sa Unit II sa Carbon Public Market diin anha temporaryo nga ibalhin ang kapin sa 700 ka manindahay sa Warwick Barracks ug Freedom Park aron kasugdan na ang development sa maong dapit.
Si Ferrer nagkanayon nga sugod pa lang kini sa ilahang mga plano ug ang final market nila mas maayo pa gyud ug mao kini ang proyekto nga alang sa tanang tawo.
Kalabot sa mga hagit nga ilang nasugatan giangkon ni Ferrer nga duna kini epekto gamay sa ilahang proyekto sama sa kalangay apan iyang giklaro nga
ilahang pamaagi gyud mao nga makig-estorya sa mga manindahay ug paminawon ang ilahang mga hangyo ug kabalaka ug sa sinugdanan pa lang ilaha na kining gibuhat.
Sugod kagahapon hangtud sa ikaduhang semana sa buwan sa Pebrero niining tuiga hingpit na nga makabalhin sa interim market ang kapin 700 ka vendors sa Warwick Barracks ug Freedom Park.
Pipila sa mga manindahay nga nagsuogd na og pamaligya sa interim market nagkanayon nga walay problema nila ang pagbalhin tungod kay mahalinan raman gihapon sila. (BANAT NEWS)
- Latest
