CEBU, Philippines — Human mauswag og pipila ka higayon tungod sa bagyong Odette ug mga kakulian ipadayon na ang gipaabot nga grand draw sa PaBAKUNATa Bonanza sa Cebu City nga dunay dagkong papremyo alang niadtong mga nagpabakuna.
Target sa kagamhanan nga mapahigayon kini karong Pebrero 24 kun diin saulogon usab sa Siyudad ang Charter Day.
Kahinumdoman nga nauswag kini tungod sa Bagyong Odette sanglit naka-focus ang siyudad sa recovery program, hangtod nga naabtan usab kini sa pagtaas sa kaso sa COVID19.
Tumong sa Bakuna Bonanza nga makapadasig sa katawhan nga magpabakuna. Nasayran nga duna kini nagtangag nga mga dagkong pa-premyo.
Sa unang hugna sa raffle sa miaging tuig, nakapa-premyo na sila og appliances sama sa TV, electric fan, washing machines, bugas, gift certificates, ug groceries.
Ang ubang umaabot nga premyo naglangkob sa motorsiklo, sakyanan, house and lot ug uban pa.
Ang pagpili sa mga mananaog gihimo pinaagi sa electronic draw nga nagikan sa listahan sa mga nagpabakuna nga taga siyudad sa Sugbo.
Pipila ka mga pribadong sektor ang mitabang sa siyudad aron mahitabo ang PaBAKUNATa Bonanza ug walay gigasto ang siyudad niini.
Gipahimig-atan sa Siyudad ang importansya sa pagpabakuna batok COVID19.
Hinuon bisan pa man nga nakapabakuna na, giawhag gihapon kini nga nga motuman gyud sa health protocols. (BANAT NEWS)