CEBU, Philippines — Ipahigayon gihapon ang motorkada atol sa pagsaulog sa kapistahan sa Our Lady of Guadalupe de Cebu nga maoy patrona sa Sugbo aron malikayan ang pagdumog sa mga tawo.
Kini ang ikaduhang tuig nga walay prosisyon sa imahen sa patrona gumikan sa nagpadayon nga pandemiya ug gihimong altenartibo ang pagmotorkada.
Matud sa chairman sa worship committee sa Parish Pastoral Council sa Archdiocesan Shrine of Our Lady of Guadalupe de Cebu Ernyl Henry Redula nga ang maong desisyon subay kini sa paghatag og kooperasyon sa paglikay sa mga dinagko nga tapok ug naglaom siya nga masabtan kini sa katawhan.
Ang motorkada sa imahen sa birhen ipahigayon sa bisperas sa pista karong Disyembre 11, 2021.
Nituman ang kadagkoan sa Archdiocesan Shrine of Our Lady of Guadalupe de Cebu alang sa hugot nga pagpatuman sa health protocols sa nagkadaiya nila nga mga kalihokan sukad sa pagsugod sa nobenaryo niadtong Disyembre 2 .
Sa laing bahin, gipahibawo ni Cebu City Mayor Michael Rama nga adunay initial discussion nga gihimo alang sa umaabot nga kasaulogan sa Sinulog sa sunod tuig ug padayon ang ilang plano nga gihimo mahitungod niini.
Nasayran nga magpadayon ang massive vaccination batok sa COVID-19 diin posibleng ang Sinulog sa sunod tuig kombinasyon sa virtual, physical, lightly orthodox, unconventional, innovative ug enhanced Sinulog.
Matud ni Rama nga kon makab-ot sa Cebu City ang herd immunity niining buwana s dako kini og tabang aron ang Sinulog sa sunod tuig mahimong conventional gikan sa unconventional.
Subay niini, karong tuiga gikanselar sa Sinulog Foundation Inc.(SFI) ang pagpahigayon sa Sinulog Cultural Activities nga giplanohan nga anha unta ipahigayon sa South Road Properties tungod kay daghan ang nisupak gumikan kay niadtong higayona nagkasaka ang kaso sa COVID-19 sa Cebu City.
Sama sa naandan ang kalihokan sa Sinulog karong tuiga gisugdan kini og Santos nga Misa nga gipahigayon diha sa Fort San Pedro.
Adunay mga halad nga performances ang mga local ug international contingent nga bisan og wala nakaanhi sa Siyudad sa Sugbo apan nagpadala og entry nga didto gikuha kon asa sila nagpuyo.
Gipakita usab sa Best of Cebu ang mga best performances mahitungod sa performing arts, foods, fashion ug uban pa. Decemay P. Padilla/BDB (BANATNEWS)