CEBU, Philippines — Giawhag ang mga department heads sa Cebu City Hall nga mao gyud ang motambong sa mga budget hearings ug dili ang ilang mga representante aron matarong gyud og depensa ug pagpasabot ang mga gipang-propose nga budget sa ilang departamento alang sa 2022.
Ang maong awhag gipaagi og resolusyon nga gipangamahanan ni Konsehal Alvin Dizon ug giaprobahan dayon kini sa mga kaubanan niya sa konseho. Nabatyagan ni Dizon nga sa miaging tuig , dunay ubang department heads ang nagpadala lang og spokesperson atol sa budget hearing ug uban niini kay naglisod og tubag sa mga pangutana sa konsehal.
"Mas maayo nga sila gyud ang motunga sa budget hearing , aron matubag dayon nila kun pananglitan naa mi mga pangutana ," matud pa ni Dizon.
Giawhag usab niini ang mga department heads nga magdala pud sila og utilization report alang sa budget sa ilang mga departamento sa kasamtangan nga tuig. Matud pa niya nga gihatagan nila og igong higayon ang department heads sa pagpreparar sa ilang utilizations report. Ni-request usab ang mga konsehal sa City Council Secretariat nga kinahanglan nga dunay live streaming sa budget hearings nga mosikad na sunod semana aron masayod pud ang katawhan sa kasikas alang sa gipang- propose nga mga budget.
Sa susamang higayon, mamintinar usab ang "transparency" ug "accountability."
Panghinaot ni Dizon nga ang dakong parte nga items sa maaprobahan nga budget kinahanglan dunay kalabotan sa pandemic-response. "Naa paman ta sa pandemya karon , so kinahanglan nga mahatagan gyud kini og saktong pagtagad ,"niya pa. (BANAT NEWS)