CEBU, Philippines — Ipatangtang ni Cebu City Acting Mayor Michael Rama ang mga tarpaulin, poster ug streamer nga anaa gipamutang o gipangbitay sa mga kahoy, poste, flyovers ug sa mga nag-unang kadalanan sa dakbayan nga walay pagtugot gikan sa kagamhanan sa siyudad sa Sugbo.\
Ang Prevention Restoration Order Beautification Enhancement (PROBE), Cebu City Transportation Office(CCTO), City Environmental Sanitation Enforcement Team (CESET), Barangay Environmental Officers (BEO) ang gitahasan ni Rama sa pagtangtang sa mga posters. Matud ni Rama nga kadtong mga tarpaulin, posters ug streamers sa mga kalihokan sama sa charter day, independence day ug uban pa ang gitugotan sa siyudad diin mahimo kining ibutang diha sa mga kadalanan ug sa ubang dapit sa dakbayan.
Giklaro ni Rama nga walay pilion sa maong kamandoan niya bisan ang mga poster sa mga politiko dili mahimong ibutang diha sa bisan asang bahin sa dakbayan.
“The rule is we have an ordinance no post bill and that is the ordinance anti-littering and there are ordinance against graffiti, there are ordinance regarding having the city maintain orderliness and cleanliness…Mao na the politiko aron dili mausik ang ilahang tarpaulin hala ayaw nalang i-post; kaduha kong naay gibalandra hala pangitaa si Arce, asa ni ilang mga tarpaulin”, matud ni Rama.
Gisugdan na sa siyudad ang pagtangtang sa mga tarpaulin ug gusto ni Rama nga limpiyo ang Cebu City ilabi na nga gitawag kini og Queen City of the South.