Columbarium gitugyan sa siyudad sa simbahan

CEBU, Philippines — Gi-turnover na sa Cebu City Government ngadto sa St. Joseph Parish sa Barangay Mabolo ang Columbarium Pre-Fabricated Steel forms nga gihimo sa Abraham Lee Construction.

Matod ni Konsehal Jerry Guardo, usa sa mga gitahasan sa pagpahimo og nitso sa pipila ka sam-ang sa siyudad nga gi-donate nila kini sa simbahan aron dunay magamit ang Cabantan Cemetery.

Tumong sa mao nilang lakang aron masulbad ang isyu sa kausik sa mga materyales dihang mano-mano ang paghimo sa mga nitso.

Suma pa ni Guardo nga sa maong pamaagi dali ra nga mahuman ang paghimo og nitso kay diretso na man lang nga ibuhos ang semento sa naporma nga mga steel ug molanat lang og duha ka semana ang pag-trabaho

Ang maong proyekto natigayon pinaagi sab sa pakig-alayon sa siyudad sa usa ka construction firm ug giklaro ni Konsehal Guardo nga mahimo sab nila i-akomodar ang ubang request sa ubang sam-ang kun gusto nila og Columbarium Pre-Fabricated steel forms.

“Nasabtan nako ang inconvenience kung ato ni ibalhin og laing-laing cemetery so kani siya para ra gyud ni sa Cabantan then we will look for another sponsor sad nga private nga donor nga moangkon sad sa lain nga cemetery for the donation sa kaning modular”, ni Guardo pa.

Moabot sa P100, 000 ang gasto sa paghimo sa maong modular nga nitso.

Kahinumduman nga naghimo og mga nitso ang Cebu City Government pinaagi sa pakig-alayon sa simbahan human nga nagkuwang ang lubnganan sa siyudad dihang midaghan ang kaso sa COVID-19 sa dakbayan. —MEL (BANATNEWS)