Ex gihulga kay di pa-jerjer

CEBU, Philippines — Usa ka 24-anyos nga security guard nga gipasanginlang nanghulga sa iyang uyab nga ipublikar ang ilang hubo nga hulagway kung dili makighilawas kaniya ang gisikop sa entrapment operation.

Ang suspek gidakop sa mga sakop sa Regional Anti-Cybercrime Unit Central Visayas ug Moalboal Police Station diha sa Poblacion East sa maong lungsod niadtong Miyerkules sa gabii.

Ang nasikop mao si Rodel (apelyedo gipugngan aron protektahan ang biktima), lumad nga taga Jimalalud, Negros Oriental, kinsa nakalapas sa Article 282 (Grave Coercion) RPC ug RA 9262 Anti-Violence Against Women and Children Act of 2004 in relation to Sec 6 of RA 10175  (Cybercrime Prevention Act of 2012).

Ang maong operasyon natigayon human usa ka 21-anyos nga dalagang taga Barangay Tabok, Mandaue City, ang nagpakitabang sa RACU human ang suspetsado nipasa sa iyang hubo nga hulagway ngadto sa ilang higala. Giingong gipapas ra usab kini.

Ang suspetsado gialegar nga nihulga sa biktima nga ipakatap pagbalik ang maong hulagway ngadto sa iyang mga higala, ka trabaho kung dili kini makigbalik pakighilawas kaniya.

Atol sa pagkasikop sa maong suspetsado nakuha sa possession niini ang usa ka unit sa cellphone nga gigamit niini sa pagpanghulga.

Ang suspetsado anaa na kini karon sa karsel sa Moalboal Police Station alang sa pagpasaka og kaso. —IBM (BANATNEWS)