Mga bikers pasul-obon og helmet

CEBU, Philippines — Nihangyo si Talisay City Mayor Gerald Anthony “Samsam” Gullas ngadto sa mga bikers nga magsul-ob gyud og helmet panahon sa ilang pagbiyahe.

Kini gumikan kay usa kini sa magprotehir kanila kun pananglit makasugat og disgrasya sa kadalanan.

Gihangyo sab sa mayor si Jonathan Tumulak, traffic czar sa Dakbayan nga tun-an ang ordinansa kung aduna bay balaod nga nagregulate sa ilang tinguha.

Apan kung wala pa kini sa ordinansa sa siyudad personal siya mohangyo sa mga bikers nga motuman sa pagsul-ob og helmet.

Iya sab gimandoan si Alvin Santillana, pangu sa City Disaster Risk Reduction and Management Office (CDRRMO) nga magbutang og standby nga ambulansya sa Campo 4 aron kung adunay disgrasya nga mahitabo paspas sila nga makaresponde.

Nahibaw-an nga niadtong miaging semana nagsunod ang panghitabo nga disgrasya sa mga bikers.

Ang ambulansya makit-an kung dili na kaayo daghan ang pangdad-ong pasyenti sa tambalanan.

Kini ilabi na sa adlaw nga Sabado ug Dominggo nga daghang bikers motangas sa kabukiran sa Syudad.

Gawas pa niana, nihangyo sab si Gullas nga likayan ang panagtapok ug motuman sa health protocols. —MEL (BANATNEWS)