53 ka tawo nanumpa nga moabag sa kapolisan sa Talisay
CEBU, Philippines — Nagkadaghan na ang miyembro sa Station Unified Patrol Operation and Reconnaissance Team (SUPPORT) sa Siyudad sa Talisay.
Niadtong nilabay’ng Domingo 53 ka boluntaryong indibidwal ang nanumpa nga sila moabag sa kalihokan sa kapolisan alang sa pagmentenar sa hapsay nga siyudad.
Si Police Lieutanant Colonel Gerard Ace Pelare, hepe sa Talisay City Police Station nibutyag nga anaa sa maayong estado sa katilingban ang ilang mga miyembro aron masiguro nga dili kini mag-abusar samtang ilahang gidala ang pangalan sa SUPPORT.
Gipaubos usab sila og seminar ug training aron dili sila molapas sa ilang lihok panahon sa mga operasyon.
Ang SUPPORT mao ang hiniusang pwersa sa Guardians, Centennial Force Foundation Inc. (CCF), Katipunan Kontra Krimen at Korapsyon ug Kabataan Kontra Druga at Terorismo (KKDAT).
Si Mayor Gerald Anthony “Samsam” Gullas Jr. maoy nipahurar sa bag-ong mga sakop sa SUPPORT diin ang maong kalihokan gipahigayon diha sa gym sa Barangay San Roque.
Nagpasalamat si Gullas sa mga miyembro niini nga andam motabang aron ang siyudad magpabiling malinawon.
Si Gullas nipasalig sa iyang suporta ngadto sa SUPPORT ug kapolisan. —BDB (BANATNEWS)
- Latest
