Mga violators daghan pa gihapon bisan nikunhod
CEBU, Philippines — Sa paglabay sa mga adlaw nagkagamay nalang ang mga nadakpang malapason sa Oplan Puyo nga giluwatan ni Bise Mayor Michael Rama sa dihang siya pay acting mayor sa siyudad niadtong nakalabay nga semana.
Si Police Lieutenant Colonel Wilbert Parilla, Deputy Director for Operations sa Cebu City Police Office miingon nga niadtong Miyerkules adunay 473 ka mga violators silang nadakpan, apan pagkasunod adlaw 336 nalang.
Sumala pa ni Parilla, ilahang giapil ang ihap sa Prevention Restoration Orderly Beautification Enhancement kon PROBE aron makita ang tinuoray nga hulagway sa mga nadakpan nianang Miyerkules 553, sa adlaw nga Huwebes 410. Dugang pa ni Parilla, bisan ug nikunhod taas pa gihapon kay 400 pa man kapin. Gitug-an ni Parilla, kalapasan sa curfew ang nag-una gihapon sa mga nadakpan ug sunod ang wala pagsul-ob ug facemask.
Giklaro niya nga maong nikunhod ang gidaghanon dili tungod nilugak sila sa ilang operasyon, nikunhod kini tungod sa subsob nilang operasyon sa mga sudlonong bahin sa mga barangay diin daghan ang malapason. —IBM (BANATNEWS)
- Latest
