156 namatay sa bulan sa Agosto
CEBU, Philippines — Wala pa gani nahuman ang buwan sa Agosto ning tuiga niabot na 156 ka tawo dinhi sa siyudad sa Sugbo ang namatay sa coronavirus disease (COVID)-2019 base sa datos sa Emergency Operation Center Cebu City.
Sigon ni Konsehal Joel Garganera, Deputy Chief Implementer for Inter-Agency Task Force kining 156 nga namatay nangalandig tanan sa tambalanan, mga line list nga positive sa COVID ug kasagaran wala mabakunahi, samtang ang pipila nabakunahan apan dunay karaang sakit.
“Unvaccinated, naa man say uban nga na vaccinate but then again makakita pud ka sa iyahang edad ang cause niya dili gyud COVID in fact ang COVID incidental lang tungod kay pag-admit sa hospital kinahanglan man siya i-swab so dako kaayo og tabang ang vaccinated”, sigon ni Garganera.
Ning bulana sab, 30 sa 156 nga nangamatay mga residente sa bukirang mga barangay sa north district sa dakbayan hinungdan nga gibalik sa siyudad ang cluster clinic diha sa gym sa Barangay Pit-os aron didto magpa-test ilabi kadtong dunay mga sintomas sa Covid-19.
Nasuta sab nga ang average community deaths sa siyudad kaniadto naa ra 10 percent apil niini ang mga dead on arrival sa mga tambalanan sa katapusang bahin sa buwan sa Hulyo.
Apan sa pagsud palang sa bulan sa Agosto niabot na sa 15 ngadto sa 20 percent ang dead on arrival. Tungod niini, giimbestigar sa EOC kining mga namatay lang sa balay o kadtong patay na pagabot sa tambalanan.
Ang Cebu City duna nay lima ka cluster clinics naa diha sa Tinago, Basak San Nicolas, Sawang Calero, Banilad ug Pit-os.
Burial assistance
Sa laing bahin, temporaryong usbon sa Siyudad sa Sugbo ang sistema sa pagpanghatag niini sa burial assistance ngadto sa mga tagtungod sa mga namatay sa coronavirus (COVID-19).
Sumala pa ni Konsehal David Tumulak ang siyudad na maoy moduol sa pamilya sa namatyan aron modunol sa burial assistance.
Sa karaang pamaagi, mo-apply pa ang tagtungod ngadto sa City Hall alang sa burial assistance.
"Dili gyud lalim ang ilang kahimtang, seguro atong paspasan ang paghatag kanila sa burial assistance," suma pa ni Tumulak. Ang burial assistance sa siyudad kay P10, 000. —Sanden J. Anadia/IBM (BANATNEWS)
- Latest
