Necrological Service alang kang kanhi Gov. Lito Osmena himoon sa Kapitolyo

CEBU, Philippines — Mopahigayon og necrological service ang Cebu Provincial Government alang kang anhing Gobernador Emelio Mario "Lito" Osmeña karong umaabot Hulyo 30, 2021 sa Kapitolyo.

Matod sa Provincial Information Office nga nikompirmar na ang pamilya ni Osmeña nga motambong sa maong kalihokan karong Biyernes.

Segun sa pahibawo sa Kapitolyo ang kanhi Bise gobernador Enrique Rama ug kanhi mga miyembro sa Provincial Board nga buhi pa sa panahon ni Lito ang motambong usab, lakip na ang kanhi Governors, mayors ug congressmen.

Ang Provincial Board panguluhan ni Vice Gov Hilario Davide III maoy motunol ngadto sa pamilya sa resolusyon nga ilang gipasar kagahapon sa Kapitolyo. Si anhing gobernador Osmeña nahimong gobernador sa Lalawigan sa Sugbo niadtong 1988 ngadto sa 1992 ug siya ang nangu sa paglambo sa ekonomiya sa Sugbo nga mas giila nga "Ceboom".

Siya namatay sa edad 82 anyos niadtong Hulyo 19, 2021.

Isip paghatag og pasidungog kang Osmeña, naka half- mast ang Philippine flag sa Kapitolyo. —MEL (BANATNEWS)