Cebu, Philippines — Tulo ka tawo ang nangalandig sa tambalanan human sila giingong nagtinigbasay tungod sa away sa yuta diha sa Sitio Liko-liko sa Brgy. Cañang sa lungsod nsa Oslob Biyernes sa buntag.
Ang mga nasamdan mao sila si Celitolindo Binopol, 54, Dario Bellinggan, 52 ug si Manolito Binopol.
Matud pa ni Police Corporal Nicolas Quijano Jr., Desk officer sa Oslob Police Station, parehong nanghinlo sa ilang gitikad nga yuta silang Celitolindo ug si Dario apan nagkalalis ang duha bahin sa ilang mga utlanan.
Matud pa nga nasuko si Dario ug giduol si Celitolindo dayon tigbas niini gamit ang pinute nga iyang gamit sa pagpanglimpyo. Naigo sa agtang si Celitolindo ug nisukol gamit sab ang iyang plamingko.
Dugang pa ni Quijano dunay mga silingan nga nipatunga ug nabuwag ang duha apan gikatahong miabot ang igsuon ni Celitolindo nga si Manolito ug wala makapugong mipunit kini og bato og gihapsan ang nawong ni Dario ug pagkahuman gitigbas kini og plamingko hinungdan sa mga samad niini sa dughan ug bukton. Samtang si Manolito kay nakaangkon ug samad sa walang bahin sa nawong. Ang tulo daling gidala sa Oslob District Hospital.
Matud pa ni Quijano, nagkasabot ang tulo nga dili nalang magkinihaay.