Buhatan sa FISECA sa Talisay ayuhon na
CEBU, Philippines — Nalipay ang mga sakop sa Fisheries Sea Ecological Care FISECA sa Dakbayan sa Talisay nga nahatagan na og pagtagad ang dugay na nila nga hangyo nga maayo ang ilang busloton nga buhatan.
Si Glicerio Bacaltos nagkanayon nga taod-taod na sila nag antos sa kahimtang sa ilang buhatan nga sa panahon sa ting uwan iyahay sila sa pagpangita og kapasilongan.
Kagahapon, nasinati nila ang mga tulo sa uwan samtang wa pa gyud makahunat sa pagtrabaho sa ilang buhatan.
Ang ilang reklamo ilang gipaabot sa mga tigbalita hangtud nga karon gisugdan na sa pag ayo ang ilang buhatan nga nagpangidaron na og 30 ka tuig.
Sud sa pipila ka buwan nga nadungog ang ilang hangyo nahatagan na gyud kini og pundo alang sa pagtrabaho.
Ang FISECA mao ang mga tinugyanan sa balaod sa kadagatan sa Dakbayan sa Talisay.
Sila ang responsable sa pagdakop sa mga ilegalista nga nag among-among sa mga mananap sa kadagatan. MEL (BANATNEWS)
- Latest
