Cebu, Philippines — Dakong kausaban ang nahitabo sa mga opisina sa Talisay City Police Station human ang hepe sa kapolisan sa siyudad Police Lieutenant Colonel Gerard Ace Pelare nipasiugda kini og pagpanindotay sa matag opisina.
Ang mga tawo nga adunay tuyo sa maong buhatan mahimong mokuha og libreng tubig, kape ug tea.
Ang matag opisina adunay nagkalain-laing tema apan ang nigawas nga pinakanindot ang opisina sa finance ug operation.
Kini subay sa ilang tinguha nga sugdan nila ang pagpanglimpiyo sa ilang tugkaran lahos na ngadto sa ubang mga lugar sa Dakbayan sa Talisay.
Matud ni Pelare nga nga dili paglimpiyo sa palibot ang ilang buhaton apan mao ang paglimpiyo sa mga sagbot sa katilingban.
Ang Oplan Limpyo Talisay nagpdayon apan ilaha pa kining hingusgan.
Sa laing bahin, gihimo gihapon sa Dakbayan sa Talisay ang earthquake drill diha sa mga tunghaan bisan og wala sila’y mga estudyante nga tudloanan.
Si Alvin Santillana, pangulo sa City Disaster Risk Reduction and Management Office nagkanayon nga matag quarter nila kini gihimo aron dili malimot ang mga magtutudlo sa angay nga buhaton pangandam sa katalagman.
Ang kalihokan subay kini sa kasaulogan sa National Simultaneous Earthquake Drill nga gipasiugdahan sa National Disaster Risk Reduction and Management Council.
Matud ni Santillana nga bisan pa og walay mga estudyante ang mga magtutudlo ang ilang gipahinumduman sa ilang buhaton panahon sa katalagman.
Si Mayor Gerald Anthony “Samsam” Gullas Jr. nagkanayon nga dako kini og tabang isip giya sa angay nga buhaton panahon sa katalagman. (BANAT NEWS)