CEBU, Philippines — Nagkaduol na gyud ang panahon alang sa kahumanan sa ika-tulong taytayan nga magsumpay sa Siyudad sa Sugbo ug Sa Lungsod sa Cordova nga nailhan usab isip Cebu Cordova Link Expressway (CCLEX).
Suma pa sa kadagkuan sa CCLEX, naa na sa 74.86 percent ang overall engineering, procurement and construction progress, samtang naa napud karon sa 70.33 percent ang kalamboan sa construction mismo sa taytayan.
Ang maong proyekto dunay gitas-on nga 8.5 kilometros. Una na nga gi-target nga mahuman sa katapusang bahin karong tuiga ang maong taytayan ug maagian kini sa mga motorista sa first quarter sa 2022.
Sa labing ulahi nga update sa konstruksyon, nakompleto na ang pagtaod sa 446 NU (Nebraska University) girders nga magsilbing main structural support sa agianan.
Nagpadayon usab karon ang backfilling ug ang pagmontar sa armor rocks ingon man usab ang pag-instalar sa 20 vent pipes nga mo-equalize sa dagan sa seawater sa Cordova Channel.
Hapit na usab makompleto ang low-lying bridges nga magsilbing agianan sa mga mangingisda sa Cordova paingon sa ilang fishing ground.
Nakompleto na usab atol sa kasaulogan sa 500 years of Christianity in the Philippines dili pa lang dugay ang walo ka krus nga dunay gitas-on nga 40-metros nga klaro kaayo sa Mactan Channel.
Nahuman napud ang pedestrian footbridge nga nanukad duol sa U-turn slot sa welcome tower sa South Road Properties. Ipahimutang usab ang sidewalk sa tibuok stretch sa CCLEX. —MEL (BANATNEWS)