Cebu, Philippines — Mokabat sa 200 mil ka pesos nga balor sa marijuana ang nasakmit sa kapulisan sa managlahi nga operation kagahapon, Miyerkules.
Unang operation nahitabo sa may Sitio Kamansili, Barangay Pangamihan, Siyudad sa Toledo, alas diyes sa buntag. Ang City Intelligence Unit sa Cebu City Police Office nga gipangulohan ni Police Lieutenant Colonel Randy Caballes milarot sa 200 ka punuan sa marijuana, kini human sila nakadawat ug impormasyon kabahin niini gikan sa mga molopyo sa dapit.
Ang nasakmit nga marijuana, mobalor ug 80 mil ka pesos ug aduna na silay pangalan sa gituhuang nagtanom niini.
Samtang usa ka Joel Cabiles, 43anyos, minyo, taga Barangay Climaco, Toledo City ang nasikop sa Barangay Malubog, Dakbayan sa Sugbo, alas onse kinse sa buntag kagahapon.
Nasakmit gikan sa dinakpan ang 100 grams sa pinauga nga dahon sa marijuana nga mobalor ug 120 mil ka pesos.
Sa laing kalambuan ang kapolisan sa Lungsod sa Minglanilla ug Dakbayan sa Talisay naghangyo sa mga adis-adis sa ilang dapit nga moundang na sa ilang bisyo.
Ang mga polis sa Minglanilla misuroy sa Barangay Cuanos uban sa mga opisyales ug nanoktok sa pinuy-anan sa ilang konstitwenti nga padayong nag gamit og ilegal nga drugas.
Moabot usab sa 29 ka mga panimay ang nabisita sa kapolisan diha sa Barangay Bulacao.
Si Police Lt. Roberto Barnido Jr., deputy chief sa Talisay City Police Station inubanan ni kapitan Banjo Abastillas maoy nakig estorya sa mga adis-adis nga mopaubos sa rehabilitasyon.
Ang maong programa sa kapolisan maoy paghatag og higayon sa mga tawo nga misulod sa dili maayong bisyo sa pagbag-o sa ilang kaugalingon. - Gabriel C. Bonjoc ( BANAT NEWS)