Pagbalik sa kalihukan sa sports gihangyo sa HP

Cebu, Philippines — Nihangyo ang Hunta Probinsyal sa Sugbo ngadto sa Inter-Agency Task Force for the Management of Emerging Infectious Diseases (IATF-MEID) pinaagi sa Regional IATF nga ibalik na ang sports activities sa lalawigan sama sa volleyball ug basketball.

Usa ka resolution nga gipangamahan ni bokal John Ismael Borgonia sa tersero distrito ang gipasar sa provincial board atol sa regular session niadtong Mayo 17, 2021 alang sa maong katuyoan.

"...the conduct of sport activities namely, volleyball and basketball should be allowed, provided only players of the same barangay shall participate in the same sports activity" pagbasa sa resolution ni Borgonia.

Ang pagpahigayon og sports activities sa mga lugar ubos sa Modified General Community Quarantine (MGCQ) wala pa ni gitugot sa IATF gawas lang kun adunay request ug aprobahan sa task force. Ang Probinsya sa Sugbo ubos na sa MGCQ status sukad niadtong bulan sa Hulyo sa niaging tuig. Nagtuo ang provincial board nga ang mga LGUs sa Probinsya sa Sugbo kinahanglan usab ipatuman ang "risk-based public health standards" batok COVID-19.

Nirekomendar kini nga kinahanglan nga ang mga LGUs sa Probinsya mamahimong makapahigayon sa ilang sports activities basta mapatuman ang singkwenta porsyento nga capacity limit sa mga mosaksi sa kalihokan.

Kinahanglan usab nga masunod ang ubang minimum health standards sama sa pag hugas og kamot, pag limpyo sa mga ekipo o butang nga gamiton sa pag duwa ug uban pa. (BANAT NEWS)