CEBU, Philippines — Ang lumad nga manlalangoy nga taga-Lapu-lapu nga si Cleevan Kayne Alegres mihagit kang Mayor Ahong Chan nga mupalit og garbage compactor machine kung iyang mahuman ang paglangoy sa tibuok isla sa Mactan karong Abril 24.
Si Alegres sa pakighinabi sa Banat News miingon na nasurprisa siya sa iyang pag-trend sa social media dihang nag post si Mayor Ahong Chan pagkahuman sa iyang pagbisita sa buhatan niini.
Ang 25-anyos nga si Alegres niingon nga niadto lang siya sa opisina ni Chan aron mangayo ug permiso nga mulangoy sa Mactan Island unta atol sa Kadaugan sa Mactan sa Abril 27.
Giangkon ni Alegres nga tungod sa iyang pagkahinangop sa gihatag nga suporta sa mayor, nakalimtan niya pagsulti ang tinuod nga katuyoan sa paglangoy sa open water.
Si Alegres nga gikan sa Barangay Maribago nakakita sa kausaban sa ilang lugar sa mga katuigan ug labi na dihang nag-diving na siya( (scuba ug free diving) ingon man nag spearfishing diin nakita niya ang makaluluoy nga kahimtang sa mga coral reef sa isla sa Mactan. Ang grabe nga basura maoy nakaingon nganong dili na maayo ang kahimtang sa mga coral reef.
Sa usa ka coastal clean-up nga giapilan ni Alegres, adunay niingon kaniya nga walay kapuslanan ang ilang gibuhat tungod kay kung mapuno ang basurahan, mubalik ra pud gihapon kini sa dagat.
Niini, gihunahuna ni Alegres ang “paghagit” sa mayor nga mupalit ug maski usa lang sa ka compactor sa basura para sa barangay aron masulbad ang ilang problema sa basura ug maluwas ang kadagatan gikan sa hingpit nga pagkaguba.
Si Alegres gisaway sa iyang kaambisyoso, apan iyang gipasabot nga dili kini para sa iyang kaugalingong dungog, apan alang sa kalikopan sa siyudad. —MEL (BANATNEWS)