Pagpasul-ob og face shields gilugwayan

Cebu, Philippines — Gilugwayan ni Lapu-Lapu City Mayor Junard Chan og usa ka semana ang pagpatuman sa mandatory nga pagsul-ob og face shields sa mga Oponganong mogawas sa ilang panimalay.

Si Chan miingon nga ang pagsul-ob og face shields ipatuman unta niadtong miaging Huwebes, Marso 18, 2021 apan kinahanglang lugwayan tungod wala pa mahuman ang pagpangapud-apod nila og face shields sa kabarangayan.

Hinuon ang pagsuod og faceshields estrikto lang ipatuman sa mga malls, mga sakyanan nga pasaheroan, merkado, trisikol ug uban pa.

Labaw ng gipahugtan ang pagpasuot niini mao ang napulo ka barangay nga naguna sa listahan sa dunay kinadaghanan og kaso coronavirus  disease 2019.

“Ato nang gi-identify ang mga barangay unsa tong naay daghang COVID. Moadto ta kung asang dapita, asang sityoha nga daghan og kaso, adto ta mo-focus didto para dili mo-spread ang virus,” dugang pa sa mayor.

Ang mga madakpan sa paglapas sa mandatory nga pagsul-ob face shields makamulta og P1,000 o mohimo og community service.

Sa laing bahin,  gi-adjust sa siyudad sa Bogo ang curfew hours niini ngadto na sa alas 12 sa tungang gabii hangtod sa alas- 5 sa buntag.

Nipahibalo ang siyudad pinaagi sa official Facebook page niini nga ang mga establisemento sa dakbayan tugotan nga maka operate og hangtod alas 11 sa gabie.

Ang mga makalapas sa curfew pamultahon og P1,000 sa first offense, P2, 000 sa ikaduhang offense ug pagkapriso depende sa desisyon sa korte kun pila ka adlaw sa ikatulo nga offense.

Samtang sa mga establisemento nga makalapas, ang multa magsugod sa usa ka written warning sa unang opensa, P3 mil sa ikaduhang opensa ug P5 mil ug revocation sa business permit sa ikatulong opensa. — Le Phyllis F. Antojado (BANAT NEWS)