Cebu, Philippines — Dili madayon karong buwana ang gikatakdang pagtugot nga makadunggo og balik diha sa Pasil ang mga mangingisda gikan sa Probinsiya sa Bohol. Matud sa pangulo sa Market Operations Division (MOD) Irvin Cabales nga maglisod pa og dunggo diha sa Pasil ang taga Bohol nga manananagat tungod sa nagpadayon nga kaugmaran sa fish market sa maong dapit.
Ug dili pa niya matino ang panahon nga mahuman ang maong kaugmaran apan gipaneguro niya nga makabalik unya sa pagdunggo ang mga mangingisda.
Nasayran nga giproseso kaniadto sa MOD ang gikinahanglan nga clearances sa nagkadaiyang ahensiya aron makabalik sa operasyon ang kapin sa 20 ka bangka gikan sa Bohol.
Gani adunay negosasyon nga ilang gibuhat ngadto sa opisyales sa Bohol alang sa maong katuyoan. Nasayran nga naputol ang operasyon sa mga mangingisda sa Bohol diha sa Pasil niadtong buwan sa Mayo sa niaging tuig tungod sa pandemiya.