Cebu, Philippines — Gipahibalo ni Mayor Junard Ahong Chan ang estrikto na nga pagpatuman sa pagsul-ob og face shield karong Huwebes ngadto sa mga pinili nga lugar nga naglakip sa mga mall ug mga sakyanan nga pasaheroan.
Matud ni Chan nga dili ang pagmulta og P1,000 ang katuyoan sa kagamhanan alang niadtong madakpan nga napakyas sa pasul-ob og face shield tungod kay ilang hingusgan ang community service alang sa mga nakalapas.
Naglakip sa community service mao ang paghipos sa mga basura ug kinahanglan nga mapuno ang usa ka sako sa matag tawo nga madakpan sa maong kalapasan.
Gipahibalo usab ni Chan ang pagpatuman sa work-from –home scheme sa pipila ka mga kawani sa city hall sugod sa sunod semana. Gipasabot ni Chan nga kinhanglan kini nga pagahimuon alang sa pagpakunhod sa gidaghanon sa mosulod nga mga tawo diin makatabang kini sa pagpugong nga mokuyanap ang COVID-19.
Matud ni Chan nga nag-una nga mopaubos sa work-from-home scheme nga mga kawani kadtong mga senior citizen nga nagpanuigon og 60 pataas ug ingon man ang mga persons with disability (PWD) nga gikonsiderar nga vulnerable sa COVID-19.
Gibutyag ni Chan nga ang Dakbayan sa Lapu-Lapu nakatala kini og duha ka bag-ong mutation sa virus base sa taho sa Department of Health (DOH)-7.
Si Chan nagkanayon nga nalakip sa iyang gitinguha mao ang pagtugot sa mga non-essential workers nga mohimo usab sa ilang mga gimbuhaton ubos usab sa work-from-home scheme.
Base sa natala sa kagamahanan sa siyudad adunay 29 ka kawani sa city hall ang nagpositibo sa virus apan ang walo niini ang naka-recover sa niaging semana. (BANAT NEWS)