CEBU, Philippines — Gitugyan ngadto sa Committee on Laws, Ordinances and Styling ug Committee on Transportation aron mapaubos sa review ang gidusong ordinansahon ni Cebu City Councilor James Anthony Cuenco.
Si Cuenco niduso og ordinansahon nga nag-regulate sa operasyon sa public utility buses (PUBs) uy modernized public utility jeepneys (MPUJs) nga nagdagan sa siyudad panahon sa state of calamity o hangtud sa pag-umol sa Local Public Transport Route Plan (LPTRP).
Nasayran nga kinahanglan nila nga mokuha og Special Permit (SP) alang sa ilang pag-operate sa hurisdiksiyon sa siyudad ug kini giisyu sa Land Transportation Franchising and Regulatory Board (LTFRB).
Base sa Section 4 sa maong ordinansahon nga ang PUBs ug MPUJs kinahanglang molukat og Travel Line Certificate gikan sa Cebu City Transportation Office (CCTO) sa dili pa sila hingpit nga mobiyahe.
Makita sa maong certificate ang route code, route description, date of validity, registered owner/operator, address sa registered owner/operator ug uban pa.
Kanunay nga dalhon ang travel line sanglit usa kini sa ipakita kon dunay inspeksiyon nga pagahimuon sa mga kawani sa CCTO ug i-display usab ang route code diha sa atubangang bahin sa unit.
Ang CCTO mao determinar sa gidaghanon sa units sa PUBs ug MPUJs nga pabiyahe-on matag rota.
Matag unom ka buwan ipaubos usab sa reevaluation ang operasyon niini aron masuta kon angayan ba dugangan o dili ang units nga pabiyahe-on sa maong rota.
Ubos sa maong ordinansahon ang violators makabayad og P2,000 ngadto sa P5,000 nga multa o pag-impound sa unit hangtud nga makakuha ang operator og Travel Line Certificate. —BDB (BANATNEWS)