Sunday lockdown sa Guadalupe magpadayon

CEBU, Philippines — Ipadayon gihapon sa Brgy. Guadalupe sa Cebu City karong bulan sa Marso ang naandan nga “Sunday Lockdown” gumikan sa padayong pagsaka gihapon sa mga kaso sa COVID19 sa ilang barangay.

Matud pa ni Kapitan Michael Gacasan kinahanglan gyung limitahan ang mga kalihokan sa mga tawo tungod kay king pagsige og tapoktapok mao gyuy hinungdan sa pagkapasapasa sa virus.

Dili mahimong maglaroy laroy ang mga residente gawas lang sa mga authorized persons outside their residences  (APOR) ug kun adunay emerhensya. Makasulod ra hinuon ang mga food deliveries ingon man usab ang mga PUJ ug bus aron duna puy masakyan ang mga nagtrabaho.

Kutob lang unta sa bulan sa Pebrero ang  “Sunday Lockdown” apan gilugwayan gumikan kay wala man mokubos ang mga kaso ug nagkagrabe naman hinuon. Si Gacasan nag-ingon nga libkason ra nila kini kun mokubos og maayo ang kaso kay sa pagkakaron adunay 139 ka active cases ang maong barangay.

Sukad sa pagbuto sa pandemya sa miaging tuig, ang Barangay Guadalupe nakatala na og 685 ka kaso, 548 recoveries, ug unom ang namatay.  Sa 80 ka mga sitio niini 47 ang dunay natala nga kaso sa COVID19.

Sa kinatibuk-ang ihap base sa datos nga gipagawas sa Department of Health Central Visayas niadtong Miyerkules, Marso 3 ang Cebu City nakatala og 92 ka dugang nangaayo.

Apan dunay unom nga nakalas maong nahimo na kini karong 753 ang gidaghanon sa mga nangamatay sa siyudad. Samtang 14,024 na ang nangaayo.

Ang siyudad napun-an og 159 ka bag-ong kaso hinungdan nga 17,991 na total cases niini, apan 3,214 lang ang active cases nga naa karon sa quarantine ug isolation facilities sa siyudad.

Ang Mandaue City dunay 908 aktibong kaso gikan sa 4,327 ka mga kaso niini tungod sa nadugang nga 64 ka bag-ong kaso.    Ang recoveries sa siyudad naa sa 3,234 kay 36 ka additional reported recoveries ang natala ug naa sa 185 ang deaths.

Samtang ang Lapu-Lapu City dunay 882 aktibong kaso sa 4,333 total cases niini tungod sa nadugang nga 65 ka bag-ong kaso. Duna na na silay 3,327 recoveries human nakatala og 30 ka additional reported recoveries ug 124 ang nakalas human napun-an og usa.

Ang Central Visayas duna nay kinatibuk-ang 40,030 total cases sa COVID-19; 6,657 ang active cases; 31,764 ang recoveries ug 1,609 ang deaths.—Sanden Anadia ug Decemay P. Padilla/IBM

Sunog sa Bulacao,  usa ang patay

Usa ang patay ug duha angol sa sunog nga niulbo sa may Sitio Laguna, Barangay Bulacao ning Dakbayan sa Sugbo, Huwebes sa hapon.

Nadawat sa kabomberohan ang alarma sa maong sunog alas 3:04 sa hapon ug giisa lamang sa 1st alarm.  Nakontrolar dayon kini sud lang sa pipila ka minutos ug hingpit nga napawong alas 3:29 na sa hapon.

Ang sunog gituohan nagsugod sa panimalay ni Enrita Bayaton ug gibana-bana moabot ngadto sa P200 mil ang danyos sumala pa sa pasiunang report sa kabomberohan. Ang nakalas naila nga si Maris Bayaton, 28, usa ka person with disability nga kabanay sa tagiya sa balay.

Samtang ang naangol naila nga sila si Joshua Anthony Tembravilla, 23, 1st degree burn ug Ernita Bayaton, 58,naglisod ug ginhawa.  Tulo ka panimalay ang hingpit nga naugdaw.

Padayon pa nihimo karon ug imbestigasyon ang kabomberohan may kalabutan sa hinungdan sa maong sunog. —IBM (BANATNEWS)