Cebu, Philippines — Upat ka suspetsadong durugista ang nasikop atol gipahigayon operasyon sa Regional Police Drug Enforcement Unit niadtong Huwebes.
Ang unang nangasikop si Ryan Occo, 37-anyos, taga Barangay Duljo Fatima ug Matt Jordan Cabrera, 29-anyos, residente sa Barangay Inayawan, Dakbayan sa Sugbo.
Sa ikaduhang bahin sa operasyon nasikop sila si Marvin Ragay, 33-anyos, taga Barangay Guadalupe ug Christian Lagahid, 44, taga Barangay Duljo Fatima.
Nangulo sa maong operasyon mao si Police Major Glenn Hife, hepe sa RPDEU-7.
Nasakmit gikan sa mga suspetsado ang mga pinutos nga shabu nga mobalor tanan ngadto sa P500 mil ug buy bust money.
Nasayran nga si Lagahid ug Occo giingong nalakip sa high value individual sa regional level.
Sa laing bahin, ang Philippine Drug Enforcement Agency (PDEA)-7 ug Cebu City Police Office (CCPO) nipasalig nga dili mahitabo dinhi sa Sugbo ang misencounter sama sa nahitabo ngadto sa Quezon City nga niresulta sa kamatayon sa polis ug sakop sa PDEA.
Matud sa direktor sa PDEA-7 Levi Ortiz nga matag higayon nga aduna silay anti-drug operation kanunay silang makig-alayon sa kapolisan bisan pa nga sila ang lead agency.
Si Ortiz nagkanayon nga sukad namugna ang PDEA wala pa mahitabo nga adunay insidente sa rehiyon nga nagkapinusilay ang mga police ug ilang ahente.
Gipasalig ni Ortiz nga ang nahitabo sa Quezon City dili makaapekto sa relasyon sa PDEA ug PNP.
Samtang ang director sa CCPO Police Colonel Josefino Ligan niuyon kini sa pamahayag ni Ortiz. (BANAT NEWS)