Labella: Mga gitugot lang nga pabuto ang pweding gamiton

Cebu, Philippines — Giklaro ni Cebu City Mayor Edgardo Labella nga diha sa designated firecracker zone lang pweding magpabuto atol unya sa pagsugat sa bag-ong tuig.

Matud ni Labella nga adunay mga klase sa pabuto nga mao lang ang gitugot nga pweding paliton ug ipabuto.

Si Labella nihatag na og direktiba ngadto sa kapolisan sa Cebu City Police Office(CCPO) sa istriktong pagpatuman sa rules and regulations sa firecracker zone ug ang klase sa pabuto nga maoy gitugot nga gamiton.

Gawas sa kapolisan, gimandoan usab niini si Cebu City Attorney Rey Gealon nga uban sa kapolisan sa istriktong pag-monitor sa mga tawo nga magpabuto sa ilang mga armas atol sa pagsugat sa bag-ong tuig.

Sa laing bahin, gilaoman sa mga naninda og pabuto  sa Dakbayan  sa Lapu-Lapu nga mosaka na ang ilang halin niining pipila ka adlaw sa pagsugat sa bag-ong tuig.

Si Mamerto Terol, firecracker vendor sa Barangay Babag, Dakbayan  sa Lapu-Lapu nagkanayon nga sa nilabayng pasko adunay namalit gikan sa silingang lugar apan ginagmay lang dili sama sa nangaging tuig nga daghan ang mamalit.

Gibutyag ni Terol nga nakadawat pa siya kaniadto og order sa nagkadaiyang matang sa pabuto gikan sa laing lalawigan sama sa Bohol ug Leyte sukwahi karong panahona ngamingaw ang ilang halin. – Romeo T.  Limpangog (BANAT NEWS)