Cebu, Philippines — Moabot 300 ka tawo ang nitungha sa gipahigayong bloodletting activity nga gipasiugdahan sa Tau Gamma Phi Fraternity sa Dakbayan sa Talisay.—Hinatag nga hulagway
300 ka tawo nagpakuha og dugo sa Talisay
Midagsa ang 300 ka mga tawo nga boluntaryong nagpakuha og dugo sa gihimo nga bloodletting sa Dakbayan sa Talisay.
Ang Tau Gamma Fraternity maoy nangulo sa aktibidades inubananan sa pribado ug publikong institusyon didto sa Talisay City College (TCC) niadtong Disyembre 8 ning tuiga. Matud pa ni Konsehal Jefferson Seguerra nagkasabot sila sa grupo ilabi na sa panahon sa pandemya nga daghang tawo nagkinahanglan og dugo.
Asoy pa niya nga kuwang ang dugo karong panahona sumala pa sa gibutyag sa DOH hinungdan nga namugna ang kalihukan aron makatabang ilabi na Pasko karon ug ang ilang dugo nga makolekta makatabang sa nagkinahanglan.
Nagpasalamat si Seguerra sa maong grupo , kapulisan, DOH, TCC, Grab ug ni Konsehal Ricky Aznar.
Siya nagkanayon nga aduna may wala makuhaan tungod sa pipila ka rason apan miabot gyud 73 ka bags ang ilang nahatag.
Gani aduna pay uban nga naabtan sa oras sa tingpahuway sa mga sakop sa DOH. (BANAT NEWS)