CEBU, Philippines — Gisumsoman karon diha sa social media ang matud pa paglapas sa health protocols sa mga tawong nanambong sa mini Suroy-suroy sa Sugbo nga gihimo diha sa Sanfe Fe –Madridejos- Bantayan (SMB) Escapade niadtong Nobiyembre 27 didto sa Kota Park sa Lungsod sa Madridejos.
Nag viral sa social media ang hulagway sa mga tawong nanan-aw sa maong kalihokan nga nagdasok sa Kota Park nga wala na mosunod sa social distancing ug ang uban wala mag face mask.
Ang maong mga hulagway napuno sa pag saway gikan sa mga netizens. Apan ang mayor sa lungsod miangkon nga wala na gyud nila makontrol alang tungora ang mga tawo. “Sa amo nga parte medyo wala mi ka control tungod man gud sa kahibalo na ka nga diri sa isla intawon, panagsa ra gyud maarian sa mga bisita,” pasabot pang Madridejos Mayor Salvador Dela Fuente.
Diha sa maong kalihokan silang Presidential Spokesperson Harry Roque isip pinasidunggang dinapit , Gobernador Gwendolyn Garcia, OPAV Secretary Michael Dino ug mga kandidata sa Miss Universe Philippines. Tumong sa kalihokan mao ang pagbuhi pagbalik sa turismo sa mga kalungsoran ug pagpaila sa mga tinagoang maanindot nga mga dapit sa lalawigan ngadto sa mga bisita aron pag-agni og mga turista.
“Kagahapon (November 27, 2020) nag advise gyud ta nga kinahanglan they will observe social distancing but because of the eagerness and enthusiasm sa mga tawo. Diri man gud sa Madridejos kun diin nia ra man sa isla gustong makakita og secretary, gobernador, so wala na kapugngi. In fact, gi-close ang gate sa Kota Park but niagi sila sa luyo,” matud ni Dela Fuente.
Atol sa maong kalihokan, mismo si Roque paghatag sa iyang mensahe wala kapugong pagkomento sa iyang obserbasyon nga wala na mosunod sa social distancing ang mga tawo. Apan daw gibawi niya ang kabalaka sa mga lokal nga opisyal sa posibleng mga paglapas sa health protocols pinaagi sa pag-ingon: “Pero huwag lang tanggalin ‘yung mask. Open air naman.”
Human nga nag viral ang mga hulagway ang lokal nga kagamhanan sa lungsod niabiso sa mga Lawisanon nga nitambong didto sa Kota Park nga mag home remedies aron “mapakgang ang virus nga napasa sa usa ka asymptomatic nga nga tawo nga mitambong sa maong okasyon.” “Advisory lang sila nga home remedies lang ilang gamiton. Kun mahimo mag steam inhalation (tuob) sila or moinom sila og luy-a. Actually mao gyud na among gigamit since pagsugod sa pandemic mao nay mga advisory namo,” matud ni Dela Fuente. —IBM (BANATNEWS)