CEBU, Philippines — Imbestigasyon kabahin sa pagpatay sa magsisibya didto sa Dumaguete City sayo ning tuiga wala pa gihapon moirog tungod sa kakuwang sa mga testigos nga mikooperar sa imbestigasyon ug kakuwang sa mga ebidensiyang makapalig-on sa kaso sumala pang Philippine National Police (PNP) Chief Debold Sinas.
Si Sinas kinsa mibisita sa Sugbo ning bag-ohay lang, mao ang director sa Police Regional Office-7 sa dihang nahitabo ang pagpatay kang Rex Cornelio Pepino sa Dumaguete City kaniadtong Mayo 5 ning tuiga.
Ubay-ubay pa nga mga kaso sa pagpamatay didto sa Negros Oriental ang wala pa masulbad.
Sa gipahigayon nga press conference kaniadtong Sabado, Nobyembre 21, 2020, giklaro ni Sinas nga wala nila gihunong ang imbestigasyon sa mga kaso sa pagpamatay sa probinsya sa Negros Oriental.
Matud niya pipila niining mga kaso napasaka na ug naa pa sa korte samtang ang uban padayon pang giimbestigar apan usa sa nakapalangay niini, walay mga testigong miabag kanila ug gamay ra ang mga ebidensiyang makapalig-on sa kaso.
“Meron kami puro intelligence report, pero aanhin pa natin ‘yung intelligence report kung wala namang basehan. Kung lalabas lang ‘yun, puro tsismis lang ‘yun,” sigon pa ni Sinas.
Suma pa niya nga gipahibalo siya bahin sa kalamboan sa imbestigasyon nga giingong usa ka polis maoy nagpusil sa biktima. Apan nasagmuyo si Sinas nga walay witness nga mitestigo batok sa maong polis isip maoy mamumuno sa tigbalita.
“Kung may lalabas na witness at bagong ebidensiya, itutuloy natin ang imbestigasyon at titingnan natin na sana matuldukan napo natin yung pagpatay ni Rex Cornelio sa Dumaguete,” matud niya.
“Nanawagan nalang kami kung sino ‘yung may mga ebidensiya at may mga kaalaman tungkol sa shooting incident, sana lumabas kayo at magtulungan tayo para ma-solve po natin ‘yung problema,” dugang ni Sinas. –IBM (BANATNEWS)