Mga kalihokan sa Fiesta Senior ug Birhen sa Regla gikanselar

CEBU, Philippines — Pormal na nga gikanselar ang mga tradisyonal sa kalihokan alang sa pagsaulog sa Fiesta Senior sa sunod tuig tungod kay nagpadayon pa ang hulga sa COVID-19.

Kagahapon ang mga pari sa Basilica, kagamhanan sa Siyudad sa Sugbo, Cebu City Police Office, Inter-Agency Task Force niisyu og joint advisory.     Ang naandan nga kalihokan nga nakanselar naglangkub sa penitential Walk with Jesus, Walk with Mary, solemn foot procession, traslacion, fluvial procession, reenactment sa nahitabong unang pagbunyag, provincial pilgrimage ug walay motorkada usab nga ipahigayon.

Sa gipahigayong press conference kagahapon ang rector sa Basilica Minore del Santo Niño Padre Pacifico Nohara Jr. nagkanayon nga usa ka solemn ug nagsentro sa  eyukaristiya ang pagsaulog sa  kapistahan ni Santo Niño sa Enero 2021.

Giingong 1,000 lang ka debotos ang tugotang makasulod sa Basilica ug gipahimagnoan kini nga magsul-ob og face shield, face mask ug magdala og alcohol.

Ang mga novena mass i-live stream kini aron paghatag og kahigayonan sa katawhan nga makasimba bisan naa kini sa ilang mga balay. Ang novena mass giuswag ang petsa gikan sa Enero 7, 2021 ngadto sa Enero 8, 2021.

Sa laing bahin, gikanselar usab ang mga kalihokan alang sa pagsaulog sa kapistahan sa Birhen sa Regla.

 Naglakip niini ang grand procession sa Nobiyembre 20, 2020 nga bisberas sa kapistahan ug hulipan kini sa grand motorcade.

Si Cindi Chan, pangulo sa Lapu-Lapu City Tourism Historical and Cultural Affairs nagkanayon nga mao kini ang nasabutan sa kagamhanan sa Dakbayan sa Lapu-Lapu ug sa simbahan paglikay sa virus.

Atol sa motorcade 10 lang ka sakyanan ang tugotang makakuyog din upat niini gikan sa simbahan ug unom ang gikan sa kagamhanan sa siyudad. — Romeo T.  Limpangog/BDB (BANATNEWS)