Sa laing kalibutan

Sa pagkatinuod lang, di ko motuo og multo, ilabi na kadtong multo nga manghasi ug manghadlok sa mga buhi. Angkunon nuon nako, nga duna koy mga talagsaong mga kasinatian sa mga tawong nitabok na sa pikas kinabuhi. Kadto nga mga kasinatian nakapabuhi sa akong pagtuo nga duna gihapoy kinabuhi human dinhi.

Di nako maesplikar apan nituo ko. Dulot gyud sa akong pagkatao. Ug kini maoy nagpalig-on sa akong pagsalig sa Ginoo.  Wa na ko mahinumdom kinsay nagsulti niini: “To those who believe, no explanation is necessary. To those who don’t, no explanation is possible.” Motuo man ko nga kaning atong oras sa kalibotan temporary lamang ug dunay nagpaabot nga kinabuhing walay kataposan.

Daghan katuigan na ang nakalabay, usa ka babayeng empleyado sa University of the Visayas milayas ug gidala ang mga importanteng dokumento sa tunghaan. Amo siyang gipapangita apan wala gyud siya hikit-i. Dayon usa ka adlaw niana, kalit siyang mibutho sa akong buhatan, nangayo og pasaylo sa iyang nabuhat. Samtang nagbakho, iyang gitug-an nga giduaw siya sa akong inahan nga si Mama Pining, kinsa hagbay rang nitaliwan ngadto sa laing kalibotan. Kaning babayhana, wala pa sukad makakita personal kang Mama sa buhi siya. Matud niya, gitambagan siya ni Mama Pining nga iuli ang mga dokumento. Nakaingon gyud ko, wa gyud diay mi biyai ni Mama. Sa amo sab nga Agencia Kalisagan, ang pawnshop nga akong giablihan niadtong 1979, namatay ang sinaligan namong appraiser, ang iyang assistant appraiser nalang maoy nidala. Naguol man tuod mi, apan nagpasalamat nalang sab nga duna pay usa nga nahibilin nga makapadayon sa negosyo.  Apan nakurat nalang ko ug nasagmuyo kay paglabay lang sa pipila ka adlaw ang bag-ong in-charge sa pawnshop niduso og resignation letter; ang rason nakakita siya og mas maayo oportunidad sa uban. Tungod niini, naghunahuna ko nga sirad-an nalang ang pawnshop. Lisud baya mangita og kasaligan ug makamao sa pagtanto, molanat pa og taas nga panahon aron matudloan ang ipuli.

Apan usa ka adlaw niana, sayo sa buntag, kalit nga nibalik ang mi-resign na unta nga in-charge ug gibakwi ang iyang resignation letter. Matud niya, ang nitaliwan niyang kanhi labaw nipakita kaniya ug gihangyo siya nga ipadayon  ang pagtrabaho sa pawnshop. Sa laktod, nibalik siya ug nipadayon sa trabaho.  Duna pay laing di maesplikar nakong kasinatian mao kadtong pagpatay sa us aka sikat nga basketbolista  samtang kini nagduwa og mahjong kauban ang mga higala.  Nakaila gyud ko aning tawhana tungod kay estudyante siya kaniadto sa UV ug star player kaniadto sa UV Green Lancers.   Nibiya siya sa UV human na-recruit sa PBA didto sa Manila. Ang balita bahin sa iyang kamatayon nakapaguol gyud kanako. Pagkasunod adlaw, ang bag-ohay palang nataud nga telepono sa among balay ni-ring.  Natingala ko kay wa pa mi nahatagan sa numero niini. Adtong una, abi lang nako og lineman nga nagtrabaho niini maong akong gitubag … ang caller nagpailang kadtong basketbolista! Naglagot ko imbes nga mahadlok, basin mga way lingaw nga tawo ang nanawag ug gusto lang ko komedyahan. Apan asa man siya og numero? Nganong kabalo man sila nga managkaila mi personal niadtong basketbolista? Seryuso kaayo ug daw nagpakiluoy ang tingog sa pikas linya. Ang lalaki nagpakitabang nga makab-ot ang hustisya.  Nianang semanaha, us aka editorial sa The Freeman ang among gipagawas nga nagkondenar sa pagpatay sa kanhi Visayanian ug Sugboanon. Tungod aning mga kasinatian, misaad ko nga matag adlaw nga Lunes, mohalad ko og Misa ug pag-ampo para sa tanang mga kalag nga nahimong parte sa akong kinabuhi.    Sa matag paghinumdom nato sa mga mitaliwan na, gipahinumdoman nato niini ang atong kaugalingon nga kita mga mortal sab. Pamalandong kini nga ang atong kinabuhi may utlanan. Ug makahunahuna kita nga importante gyud nga mag-ampo kita kanunay ngadto sa Ginoo, mas pa karon nga dunay pandemiya.  Gani, di gyud unta maayo nga mag-ampo lang kita kun desperado na ta. Kinahanglang mag-ampo kita nga daw nagsaulog ug mapasalamaton, panahon nga kita milampos, natinuod atong pangandoy o kun duna tay nahimong maayo sa uban ilabi niadtong labing nagkinahanglan. Angay sab tang mag-ampo para lang dayegon ang kaayo sa Ginoo.  Ang gahum sa pag-ampo permanente na sa akong kinabuhi sa ginagmay o dinagko mang paagi. Kun magul-anon ug nasagmuyo ko, ako ning ibubo tanan sa pag-ampo ug mauli-ulian ra ko human niini. Nahatag kanako ang mga gagmay nga personal nakong gipangayo pinaagi sa pagampo ug kini dako kaayo nakong gipasalamat. Ang pagsalig mahinungdanon kaayo namong duha sa akong kapikas nga si Nena.Ang Espiritu Santo, ang Balaang Batang Hesus, ang kanunay nakong kauban nga si  Sr. Santo Niño, ang Most Sacred Heart of Jesus, ang Blessed Virgin Mary ug si Servant of God, Teofilo Camomot, maoy sentro karon sa akong mga pag-ampo. Amo sab gisampit ang mga Balaang Santos sa Kalangitan nga nagsaulog sa ilang pangilin karong adlawa.  Mapasalamaton ako sa leksyon sa kinabuhi nga akong nakat-onan gikan sa akong mga ginikanan ug mga apohan. Ang ilang mga gipangtudlo maoy nigiya ug nakapalambo kanako. Di kabayran ang ilang nahimo ug ang tim-os nga paghigugma nga akong gipaagi sa kanunay nga paglakip kanila sa akong mga pag-ampo alang sa kahuwayan nilang dayon sa pikas kinabuhi.—IBM