The Impossible Dream

Sa unang pagtaak nako sa hawanan sa Kongreso ug milingkod kauban sa mga inilang kaubanan, way laing nasulod sa akong hunahuna kondili ang mga tawong niuban kanako sa panahon sa kampanya, ilabi na silang  kanhi Naga City mayor, anhing Ferdinand Chiong;  kanhi Talisay City Mayor Soc Fernandez; Dr. Eladio C. Dioko, Atty. Dodong Baduel, Judge Benjie Cobarde ug Atty. Rey Belarmino. Dako sila og natampo sa akong kadaugan. Labaw sa tanan, nasulod sa akong hunahuna ang akong igsuong si Eddie,  kinsa maoy mihangyo kanako nga atimanon ang First District of Cebu samtang dili pa siya mahimong makadagan sa pagka-kongresista kay ikatulo na niya kadtong termino.   Hinuon dili na bag-o kanako ang operasyon sa politika ilabi na ang kampanya.  Kay sa dihang unang nikandidato si Eddie sa Kongreso niadtong 1969, ako maoy nidumala sa iyang kampanya. Naa nako kahibalo bahin niini. Apan ang naghatag gyud kanako og kusog mao ang Balaang Batang Hesus, si Sr. Santo Niño ug Blessed Virgin Mary.

Sa pagkadaog nako sa eleksyon, gisultihan ko dayon ang akong office staff – Maam Sonia Cabrera, Pamela Autor, ug Aqui Zapanta – usa ra ni ka termino. Apan determinado ko nga dunay dakong matampo anang usa ka termino. Ang misyon nga akong gitaak dili lang diay taga First District sa Cebu maoy mabulahan.

Gawas sa pagatiman sa akong distrito, naa kanunay sa akong hunahuna ang mga puclic school teahers. Ang mga pulong sa akong Lola Andrea milanog sa akong hunahuna: “Wa’y dahon nga matagak gikan sa kahoy kun di gimbut-an sa Kahitas-an.” Basin kining usa ka termino sa Kongreso kapalaran, kinahanglan nakong buhaton ang tanan.

Nianang panahona, gibahin nako ang akong panahon, sa Kongreso u gang pagpadagan sa University of the Visayas. Ang biyahe ngadto sa Manila ug balik kada semana makahapo sa lawas.  Apan ang mga pulong ni Mama Pining maoy nakasustinir kanako: “Dodong, always remember that we are all living on borrowed time, and so make sure to do your very best in order to engrave footprints of kindness in the hearts of those who are in need.”

Nagkinahanglan og tabang ang public school teachers. Sa akong pagduaw sa usa ka public school sa Mandaue kauban sa kanhi mayor Demetrio Cortes ug akong classmate nga si anhing Judge Lorenzo Paradiang, dihay grupo sa mga mga magtutudlo ang mipaabot sa ilang suliran bahin sa ilang suholan. Sentralisado diay ang ilang payroll; tanan adto sa Manila himuon; maong lisud ug dugay masulbad kun dunay sayop, luoy tawon ang mga pobreng magtutudlo. 

Kinahanglan nakong molihok. Makaguol kay kining halangdong propesyon naputos sa utang kay di moabot sa tukmang oras ang ilang sweldo. Samot akong giganahan molihok kay ang DECS regional director, si anhing Dr. Eladio Dioko misulti kanako nga malipay gyud sa akong buhaton ang mga magtutudlo kay siya mismo nagsugod sa kinaubsan hangtud misaka ang ranggo.

Duol kaayo sa akong dughan ang mga magtutudlo. Nagtubo ko ubos sa pagatiman sa mga magtutudlo. Ang akong ginikanan dunay mga empleyadong magtutudlo, sa laktod nagdako ko kauban ang mga maayong mga magtutudlo.

Gihimo nako kining misyon; akong gisuwat ang House Bill No. 2542, ang tumong mao ang pagumol og DECS regional payroll service units sa tibuok nasud.  Ang maong mga buhatan na maoy moproseso, mopreparar, ug mohatag sa sweldo diha sa ilang ginsakupan.

Bisan maayo ang intensiyon, miagi kini og kalisdanan. Gisugat kini og oposisyon gikan mismo sa mga tawong naa sa taas nga posisyon nga dunay koneksyon sa mga higanteng financing companies. Apan wa ko matarog. Gibubo nako tanan nakong kusog aron lang mapasar kini, naa kanunay sa akong hunahuna ug kasingkasing ang mga pulong ni Papa Inting: “A true- blooded Visayanian fights best when the odds are greatest!” Balik-balik  ko sa opisina ni kaniadto DECS Secretary Edilberto de Jesus, miapelar ko sa mga Senador aron lang paboran akong kawsa.

Oktubre 23, 2002,  nagbunga ang akong paningkamot. Giaprubahan sa Kongreso ang House Bill 2542. Apan unang tikang pa kadto. Milanat og dul-an usa ka tuig natanggong sa Senado ang balaudnon. Naguol ko apan determinado ko, nag-ampo ako kay mao kini ang akong kinakusgang hinagiban.

Human sa taas nga panahon, si Secretary de Jesus mitug-an kanako nga gimandoan niya si Undersecretary Juan Miguel Luz nga umolon ang DECS regional payroll service units sa mga piniling lugar. Husto si Papa Inting, “If you have noble intentions, the Lord will always answer your prayers.” Adtong Hunyo 22, 2004, si Presidente Gloria Macapagal-Arroyo mitambong sa pagsubo sa unang regional payroll office sa DECS Cebu, siya maoy personal nga mitunol sa tseke sa mga public school teachers sa  Talisay City, nga pwerteng lipaya kay sila maoy unang benepisaryo sa akong balaudnon. Dako akong pasalamat sa mga tawong nakatampo sa akong misyon nga ma- regionalize ang   payroll sa public-school teachers ug DECS non-teaching personnel. Sila mao silang 12th Congress: kanhi Congresswoman Nerissa Soon-Ruiz, Congressman Meling Espinosa, ug Congressman Nonoy Andaya.

Nakompleto ang DECS regional payroll offices  Hunyo  2006. Ang  public school teachers ug ubang DepEd personnel sa tibuok nasud – gawas lang sa Region IV, ARMM ug NCR – makakubra na sa ilang sweldo ug makaresolba sa mga problema bahin niini sa ilang rehiyonal nga buhatan.

Naserbisyohan nako ang akong termino. Nahimo nako ang akong gisaad panahon sa kampanya– “to serve to the best of my abilities” sud lang sa usa ka termino.

Nabulahan gyud tawon ang mga magtutudlo sa probinsya kay di na sila kinahanglang mobiyahe padung sa Manila para lang hikayon ang mga sayop sa ilang sweldo. The impossible dream is possible, after all.