200 milyones nga road projects gi-inagurahan sa Bantayan

CEBU, Philippines — Moabot ngadto sa P200 milyones nga kantidad sa mga road projects ang gi-inagurahan didto sa isla sa Bantayan.

Sa report sa Sugbo News, ang gidumala nga news portal sa Probinsya sa Sugbo, lakip sa mga proyekto mao ang road concreting projects sa Barangay Sulangan, Bantayan (P11,908,450.34); Poblacion, San Agustin sa Madridejos (11,908,450.34), Ticad-Sillion road section sa Bantayan (P11,908,450.34), ug Maricaban road section sa Sta. Fe  (29,277,845.01).

Dili momenus  P40,082,490 usab ang gigahin didto sa Barangay Sulangan alang sa ikaduha nga  road concreting project samtang sa Cogon-Kabac road sa Bantayan nakakuha og P41,790,399 ug ang Bunakan road section sa Madridejos nagahinan og P21,612,145.26. sumatotal moabot P103,483,034.26 kini tanan.

Si Cebu Governor Gwendolyn Garcia maoy nangulo sa pag-inaugurate sa maong mga dalan atol sa iyang pagbisita sa isla niadtong weekend.

““Ayaw og paghuna-huna nga kutob ra ta diri, dili, kay basta naa pay dalan nga wala pa ma- semento, sementohon. Tagai lang ko ninyo og gamay’ng panahon kay bisan gani dunay pandemya padayon gyud ang atong mga trabaho kay kinahanglan nga kamo matagaan og paglaum,” matod ni Garcia.

Ang maong mga proyekto apil kini sa 250 kilometros sa mga road projects nga target sa Probinsya sa Sugbo karong tuiga. (BANAT NEWS)